أعرب العميد محمد مرجان نائب رئيس شركة استادات الوطنية عن شعوره بالفخر الشديد بعد ظهور فرع النادي الأهلي الرابع في التجمع إلى النور مؤكدا على أنه صرح وطني يدعو للفخر الشديد. وقال محمد مرجان :«ألف مبروك لجماهير النادي الأهلي والف مبروك لأعضاء النادي الأهلي وألف مبروك لكابتن محمود الخطيب، الخطيب الحقيقة صعّب الأمور على أحد وزي ما الكابتن الخطيب نفسه قال الأهلي أجيال بتسلم بعض وده أكيد، بس هو عشان بيحب يعمل كل حاجة بشكل كويس قوي وممتاز صعّب الإنجازات على اللي بعده وعشان إخلصه واجتهاده ربنا كرمه». وتابع محمد مرجان الذي كان يشغل منصب المدير التنفيذي السابق للنادي الأهلي: «أنا واحد من الناس قعدت مع كابتن حسن حمدي وإحنا بنخطط لفرع الشيخ زايد وقعدت مع كابتن محمود الخطيب عشان نخطط لبناء الفرع ده، عشان كده النهاردة احنا اقفين النهادرة سعداء جدا، وسعداء طبعا إن الهيئة الهندسية نفذت الفرع ده واللي جاء بنائه وتنفيذه متوافق مع الرؤية السياسية لمصر الجديدة والجمهورية الجديدة». واختتم محمد مرجان: «الأهلي جزء من هذا الوطن وكل الشكر للدولة المصرية والنادي الأهلي نادي وطني ومحدش يزايد على وطنيته وعشان كده النهاردة إنجاز كبير جدا في ظل ظروف صعبة جدا اقتصاديًا على مستوى العالم كله».