هاجم محمد رضا «بوبو»، لاعب خط وسط الفريق الأول لكرة القدم بنادي فيوتشر السابق، وبيراميدز الحالي، إدارة نادي فيوتشر، بسبب عدم حصوله على مستحقاته المتأخرة. وكتب «بوبو»، عبر صفحته رسمية على موقع التواصل الاجتماعي «فيس بوك»: «خلاص مبقتش قادر أصبر أكتر من كده بصراحة، حتى لو العواقب كتير ولو هيحصل إيه، المهم أهدي النار اللي جوايا شويه عشان أكون حتى ارتحت من جوايا وكده كده ربنا موجود وهيجبلي حقي». وأوضح: «أنا كنت خلصت وجالي اتصال تعالى ضروري النادي عشان تمضي الاستغناء بتاعك عشان خلاص أنت مشيت قولت حاضر وركبت عربيتى وطلعت على النادي». وأضاف: «الساعة 11 بليل الناس قبلتنى في النادي وقالولي عامل إيه يا رضا عايزينك تمضي ورقتين ورقة مخالصة والاستغناء قولتلهم الاستغناء حاضر همضي مفيش مشكلة، أمال إيه اللي يخليني أمضي مخالصة؟، وأنا ليا 4 ملايين و200 ألف جنيه، في واحد لا داعي لذكر اسمه لأنه ده ميعرفش ربنا طبعا قعد يكلمني ولازم تمضي ولازم تمضي أقوله إزاي يا كابتن أمضي مخالصة وأنا ليا فلوس؟، قولت مش همضي ومشيت ومضيت على الاستغناء، جالي اتصال إمضي وأنت فلوسك عندي ومتقلقش إمضي وأنت وزملاؤك اللي ماشيين هنيجي ونسلم عليكم وتاخدوا الشيك بالدولار زي باقي الفرقة ونشكركم، أكيد يعني؟، قال آه إمضى بس، اتفقت مع الاتنين إللى كانوا معايا عشان كنا متفقين إننا هنعمل كل حاجة بالاتفاق مع بعض، فقالوا هنضمي كلنا ونروح التلات ناخد الفلوس، مضينا على الورقة ومكناش مديين أي خوانة لحاجة، جه يوم التلات لقينا اللعيبة كلها صحبنا اللي في الفرقة طلعلهم فلوس، وكل واحد شيك ما عدا إحنا التلاتة والتلاتة المعارين اللي مشيوا من النادي!!». وأكمل: «اتصلت بالشخص ده قولتلو الشيك بتاعنا إمتى؟ قالي بليل في ناس الصبح وف ناس بليل وأنت بليل، قولتلوا ماشي، جه بليل كلمتو قالي الصبح، فضلت على الحال ده كل يوم، يوم يقولنا التلات الجاي، ييجي التلات يقول الأسبوع الجاي ييجي الأسبوع الجاي يتقال بكرة، كمان يومين، على الحال ده في حد مشكور طبعا بدون ذكر اسمه قالي أنا بحبك وأنت أخويا الصغير لو أنت مفكر إنك طلعلك فلوس يبقى بتحلم، مصدقتيش وقولت لا أكيد الفلوس هتطلع، الناس كلموني وقالولنا الفلوس عندنا وأنا مصدقهم ومعايا بس من الواضح إن مفيش فلوس جايه ولا أي حاجة». وتابع: «علي العموم حسبي الله ونعم الوكيل في كل واحد أكل حقي وتعبي اللي شقيت فيه سنتين تعبت وسفر هنا ولعبنا إفريقيا وخدنا بطوله وطلعنا مركز رابع سنتين يعني الحمد لله مقصرتش ف حاجة، بس فكرة إن حد ياكل حقك ف دي صعبة عليا أوي وأنا زعلان لأن مشفتيش التقدير، أنا إتبعت أنا وصحابي وحلينا أزمة للنادي برقم كبير يعني أنا ممشيتش ببلاش ولا مكنتش بلعب ولا مكنتش مساهم ف ده كله عشان تاكل حقي بالطريقة دي؟! أنا عارف الكلام ده هيضايق ناس بس دي الحقيقة. أنا ليا حق وعلى حق وأنا عمري ما كنت بخاف من أي حاجة. بس إزاي بتعرف تنام تحط دماغك على المخدة وأنت آكل حق وشقي واحد طلع عينه عشان يجمع رقم ذي ده وأنت عايز تاكلوا عليه بكل سهولة كده؟ أنا مكلمتيش حد من الصحفيين صحابي واللي أعرفهم إنهم ينزلوا الكلام على لساني أنا حقي عند ربنا وربنا هيجبهولي أضعاف وأنا متأكد لأني مقصرتيش ف حاجأ وربنا يعلم كده، أنا من جوايا ارتحت».
