وجه الفنان أحمد السقا، رسالة إلى الفنان رامز جلال، بعد سقوطه في فخ برنامج المقالب «رامز نيفر إند»، قائلا: «الله يسامحه». وتابع السقا خلال لقائه الإذاعي ببرنامج «الراديو بيضحك» الذي تقدمه الإعلامية فاطمة مصطفى على الراديو 9090: «أنا أكلت التعبان في برنامج رامز جلال كنوع من التفريغ العصبي». ولفت السقا إلى اكتشافه المقلب قائلا: «عرفت إنه مقلب رامز جلال لما ابتدى يوطي ويرمي حاجة، وظهرلي الماسك اللي لابسه، بس والله العظيم أنا لغاية ما طلعت المطعم الطائر مكنتش عارف حاجة عن المقلب، وأول لما ابتدى طلعت فوق الكرسي ابتدي يتحرك أدركت انه مقلب، ومرضتش أبوظ الحلقة، وانا بطبعي لساني مش طويل ومبعرفش اشتم ولا اتخانق». وأردف: «يمكن زمان في قرش البحر انفعلت وضربت الولد اللى كان عامل كاميرا مان لأن جزمتي ومحفظتي وكل حاجة وقعت في المياه، وكنت طالع على أساس إنه برنامج لترويج السياحة وقتها ومش متوقع إنه مقلب ولما عرفت ضحكت على نفسي وطلعت عبيط». واكمل:«بعد حلقة رامز جلال الناس قالوا ده كل التعبان فأنا بقول للجماعة بتوع حقوق الحيوان أنا آسف إني كلت التعبان، بس فيه حاجة معينة مجنناني لحد دلوقتي فضلت ماسك السمكة القرموط وجالي حالة تشنج عصبي القرموط مبيتمسكش وأنا مش عارف مسكته إزاي بس من التوتلا قفشت فيه».
