هاجم حسام حسن، المدير الفني للفريق الأول لكرة القدم بالنادي المصري البورسعيدي، رضا شحاتة، نجم الأهلي السابق، بعد تصريحه الأخير بصعوبة عودة التوأم للنادي الأهلي مرة أخرى من خلال تولي تدريب فريق الكرة، كما وجه رسائل نارية لمسؤولي الأهلي السابقين. وقال حسام حسن، في تصريحات تليفزيونية عبر فضائية «إم بي سي مصر»: «إدارات النادي الأهلي في الفترات الماضية، أعطت الفرصة لأي حد يتكلم على رموز وأولاد النادي الأهلي اللي بجد». وأضاف: «لما يجي رضا شحاتة، قعد في الأهلي سنة ولا سنتين يقول أنا عارف الأهلي كويس وعارف داخليات الأهلي كويس! أنت لعبت شهرين ولا سنة يا رضا مع احترامي الشديد ليك، أنت جاي من المنصورة لعبت في الأهلي سنة على رأسنا ولكن أنت مش ابن النادي». وأكمل: «النهاردة لما يجي وائل جمعة يلعب في الأهلي سنتين ولا تلاتة ولا أربعة ويجي أبوتريكة يلعب ست سنين ولا خمس سنين، هو مش ابن النادي الأهلي، ويجي عصام الحضري، يلعب 5 ولا 6 سنين ويقولك أنا ابن الأهلي، هما مش أبناء الأهلي هما أضافوا للأهلي زي ما أنا وإبراهيم روحنا الزمالك لعبنا 4 مواسم وخدنا بطولات أكتر من رموز نادي الزمالك مثل حسن شحاتة وفاروق جعفر وأكبر لاعب في الزمالك ماخدش البطولات اللي خدناها مع النادي في 4 مواسم، ولكن احنا مش ولاد نادي الزمالك ولكن تشرفنا بوجودنا في نادي الزمالك ومبقولش احنا أولاد الزمالك و(اتشعبط فيه) ومبقولش أنا عارف داخليات الزمالك، زي رضا، جاي سنتين ولا تلاتة ولا سنة، ويقولك أصل أنا عارف داخليات الأهلي وحسام وإبراهيم مش هيدخلوا النادي الأهلى! أنت مين يا رضا معلش، مين اللي اداك فرصة للكلام ده». وتابع: «أرجو قبل ما الناس تموت بما فيهم احنا، أعملوا برنامج وتشوفوا احنا مشينا إزاى ورجعنا من سويسرا إزاى، أخدنا شنطنا عشان صالح سليم قالنا النادي الأهلي محتاجكم والكابتن صلاح حسني كانت منتظرنا في البيت في سويسرا، أخدنا شنطنا من غير ما نعرف النادي وده مش عمل احترافي ولكن النادى الأهلي بالنسبة لنا حاجة كبيرة». وواصل:«لما رجعنا الأهلي وأخدنا في 7 سنوات بطولات وكنت في منتخب مصر راجع من بطولة أمم 2000 لاقينا نفسنا بره النادي على الرغم من كانت لدينا عروض من تركيا، ألاقى العقد خلص ويقولي شوفوا مصلحتكم». وأردف: «من حق أي نادي يمشي أي لاعب، ولكن لما أمشي كباتن الفريق أقول أشكركم على ما قدمتوه لناديكم ويتم عمل حفل تكريم»، مضيفًا: «من حق الإدارة تقول شكرًا مش هنجدد معاك ولكن يتم تعويم الأمور ويقولك عاوزين حسام وإبراهيم لا، ده محصلش». واختتم حسام حسن، تصريحاته قائلًا: «لو هناك 12 أو 10 كباتن في تاريخ الأهلي أنا وإبراهيم من ضمنهم»، مضيفًا: «أتمنى يتعمل برنامج يجي حسن حمدي ومحمود الخطيب وصلاح حسني، يقولوا احنا جينا ازاي من سويسرا ومشينا إزاي، مشينا غصب عننا، ولكن ربنا كرمنا وحصلنا مع نادي الزمالك على بطولات».
