كان فية بنوتة جميلة اسمها كمان جميلة، جميلة بنت شاطرة وذكية جدا، بتحب دايما تعرف كل حاجة جديدة، زى تسريحة الشعر الجديدة وكمان إيه أجدد الفساتين والتوك، وكل حاجة هى بتحبها، ودا خلاها بتقعد وقت كبيير جدا ماسكة الأيباد أو الموبايل عشان تتابع كل حاجة جديدة. وكانت كل ما مامتها تطلب منها حاجة تكون زهقانة ومش عايزة تقوم تعمل المسؤوليات بتاعتها، ودا كمان أثر جدا على مذاكرتها ومبقتش خالص مركزة. وبقت كل ما تقعد أكتر وأكتر على الموبايل أو الأيباد وحد يطلب منها حاجة تقعد تنفخ تنفخ وتكون زهقانة لحد ما مرة واحدة لاقت نفسها من كتر ما هى بتنفخ قاعدة جوا فقاعة هوا (بابل) كبيرة جدا، مبقتش بتسمع أى حد بيندة عليها، وكمان فضلت جميلة مش عايزة تعمل أى مسؤوليات وعايزة تفضل جوا البابل بتاعتها مبسوطة وسعيدة، وفضلت كدا ترجع من المدرسة تجرى على أوضتها تمسك موبايلها وتنفخ البابل بتاعتها وتقعد جواها ومش مركزة ولا سامعة ولا شايفة أى حاجة حواليها. وفى يوم قررت مامتها إنها تخرجها، يوم جميل ويزوروا فيه مكان واسع كله ألعاب وخضرة وتقضّى جميلة وقت جميل. وهما فى الطريق كانت جميلة قاعدة فى البابل بتاعتها وكانت مامتها كل شوية تقولها: بصى المنظر دا جميل إزاى.. شايفة النيل والمراكب فيه حلوة إزاي!. بس طبعا جميلة كالعادة مش شايفة ولا سامعة وما عرفتش تستمتع خالص بيومها ولا المناظر الجميلة اللى فيه. وكان عيد ميلادها كمان أسبوعين. طلبت من مامتها إنها تعمل حفلة وتعزم فيها أصحابها الحلوين. مامتها وافقت بس قالت ليها بشرط صغير مش هننفخ البابل بتاعتك فى اليوم دا ومش هنمسك الموبايل ولا الأيباد خالص ونقضّى مع أصحابنا وقت لطيف. وقعدت جميلة تفكر فى اليوم دا وتزين البيت وكمان جابت أحلى تورتة وعملت أفكار وألعاب كتير عشان تلعب هى وأصحابها ويكونوا مبسوطين. ويوم العيد ميلاد جه أصحاب جميلة كلهم وعقبال ما اتجمعوا وكانت جميلة بتحضّر مع مامتها العصير رجعت ولقت كل اصحابها ماسكين الموبايلات وكل واحد نفخ البابل بتاعته وقاعد جواها ومش سامع ولا شايف أى حاجة حلوة حواليه. قعدت جميلة تروح لكل حد فيهم وتطلب منه يخرج من البابل ويلعب معاها لكن كل حد كان يقولها: حاضر شوية وجاى. وفضلت جميلة قاعدة حزينة فى يوم ميلادها وقالت لمامتها: يارتنى ما كنت علقت الزينة أصحابى مش عايزين يلعبوا معايا ومش عارفين يخرجوا برا البابل بتاعتهم، بجد يا ماما البابل دى حاجة وحشة قوى أنا هقوم أمسك الكورة واحدفها عليهم وأخلى البابل تفرقع ونلعب ونكون مبسوطين. ولما عملت كدا فعلا مع أول حد البابل بتاعته فرقعت ساب الموبايل، وبدأت جميلة تعمل كدا مع كل أصحابها لحد ما كلهم عرفوا يشوفوا اللعب الكتير اللى جميلة محضراها وقضوا وقت جميل واستمتعوا كتير بعد ما كل واحد خرج من البابل بتاعته اللى كان حابس نفسه فيها ومش عارف يكون مبسوط وهو مش فيها. وعرفت جميلة إن البابل دى مش حاجة حلوة خالص إن إحنا نفضل جواها.. ولازم لازم نقدر نتحكم فيها.
