قالت الإعلامية لميس الحديدي إن المواطن من الممكن أن يتفق أو يختلف مع الدولة في بعض السياسات إزاء بعض الملفات، وهذا حقه. وأضافت في برنامجها «كلمة أخيرة» الذي تقدمه على قناة «ON»، مساء اليوم الأحد: «ممكن تختلف وده حقك كمواطن على فكرة مش لازم كل حاجة تعجبك لكن في حاجة أساسية اللي ميشوفهاش يبقى أعمى أو مش عايز يشوف بمزاجه، ممكن نعد على السوشيال ميديا نتخانق كتير في بعض الملفات لكن الأساس في هذه القصة أننا نشهد إعادة بناء لهذه الدولة وإعادة بناء للإنسان، ونحن الآن نعيش في أكبر مشروع عمراني في تاريخ مصر من عقود مش هقدر أعد بقالنا قد إيه مشوفناش حاجات زي دي، لكن مشروعات الدولة الآن تعيد تغيير حياتنا عبر برامج الحماية الاجتماعية وملف البنية التحتية». وتابعت الحديدي: «الله يكون في عون الدولة اللي بتخصص مليارات من الجنيهات لهذا التطوير أنا الصراحة بقول دايمًا مش عارفة الفلوس دي بتتوفر إزاي الله يكون في عون وزير المالية إلى مش بينام.. إحنا شايفين دلوقتي حاجات على الارض بتتحقق ولما نشوف ده على أرض الواقع لازم نقول نقطة نظام ونقول شكرًا ممكن تختلف لكننا نعيش الآن عملية تنمية لصالح المواطن والدولة والأجيال القادمة التي عانت من تنصل حكومات سابقة ورحلت المشاكل للأجيال اللاحقة، الان الدولة تتخذ إجراءات حقيقية على الأرض وهي حياة جديدة يستحقها المصريون، والدولة تعمل من أجل هذا المواطن».
