أحلى فى الشعب المصرى انه بيضحك على كل مصيبة سودة بتهل على نافوخه و العلاقة بين الضحك و المصائب علاقة طردية يعنى كل اما بتزيد المصايب كل اما بتزيد الهموم و كل اما العقل الساخر بيألف نكت كعامل مضاد يتغلب بيه على الهموم . دا دليل على انه فى الوقت الحالى المصايب المهببة اللى بتتطاير حوالينا من كل حتة لها جوانب إيجابية و دا يمكن الدافع الأساسى اللى بيخلى الدولة تتأخر فى حلها عشان تنشط مخ الشعب و تخليه يلعلع بإبداعاته الفلكلورية الملونة . يعنى شوفوا مثلا: المخدرات من كتر ما زادت أصبح عندنا رائعة "شربت حجرين على الشيشة" مشكلة تأخر الزواج بقى عندنا "أخيرا إتجوزت و ماعدش ناقصنى حاجة" مشكلة إنتشار الجهل و الخرفات طلع دياب بأعجوبته "واعاو واعاو واعاو واعو واعو واعو" بس كل دول كووووووووووووووم... و المصايب اللى بيتألف عليها نكت كوم تانى خالص: مشكلة إرتفاع أسعار الطماطم و اللى يمكن ميكونش للحكومة ذنب فيها خلت كل الدنيا تتملى نكت حتى فى برامج الطبخ التلفزيونية اللى يعمل تورتة و يقول دى مبتتكلفش كتير دى بتمن 2 كيلو قوووطة و اللى يطلع يقول وجبتنا موفرة أغلى حاجة فيها شريحتين الطماطم حتى الجواهرجية بقم بيحطوا فى الفتارين طماطم جنب الدهب مش بقولكم شعب إبن نكتة. مشكلة الطماطم بتفكرنى بحاجتين حصلوا زمان بيدلوا على ان الشعب عندنا أهم حاجة بطنه: خلونا نرجع بالزمن ستين سبعين كدة...أيام الحرب العالمية التانية ::: أيام الحرب العالمية التانية كان فى أزمات فى معظم الأغذية الأساسية و اللى مش أساسية جدى كان بيحكيلنا انهم كانوا بيستخدموا نوع من البون بون فى تحلية المشروبات لأنه مكنش فى سكر لكن كان كل هم الشعب منصب فى الاغدية اللى مش أساسية حصلت أزمة كبيرة فى الحلاوة الطحينية فى مصر و بقى تمن الكيلو أيامها يجى 50 قرش بالنسبة للناس اللى كانت ماهيتهم أيامها تيجى جنية كدة ولا حاجة بقى سعر الحلاوة يعتبر سعر جنونى جدا اللى كان يسمع نص جنية تمن للكيلو كان يقول : "يا لهول هذه الصاعقة" الله يرحمك يا يوسف باشا و طلع الشعب بنكتة و سخرياتة و سلطاته و بابا غنوجه و طلعت الحكايات عن الشاب اللى لما جه يتقدم لعروسة أهلها طلبوا الشبكة حلاوة و الراجل الباشا الكبارة اللى فلس وهما بيبجردوا محتويات السراية بتاعته عشان فى المزاد لقوا أقراص الحلاوة الثمينة فى المطبخ لموها و عملولها مزاد لوحدها و سددت ديون الباشا و زيادة و عاش اخر منجهه من ريع الحلاوة . تعالوا بقة نرجع بالزمن ييجى 300 سنة أيام الإحتلال الفرنسى : أيام الإحتلال الفرنسى دخل الفرنساويين منطقة فى القاهرة دلوقتى لكن زمان كانت من الارياف نسيت أسمها و قعدوا فيها . الشعب إتضايق جدااااااا و ثااااااااار .... لكن تفتكروا ثار ليه ؟؟؟ ثار يا حضرات عشان ... عشان المنطقة دى فيها طريق السمن, ولان الفرنساويين كانوا بيحاصروا و بيقطعوا سكك التجارة فكدة يبقى هيقطعوا الطريق اللى بتمشى فيه السمنة و كدة مش هيوصل للقاهروية السمنة و مش هيعرفوا ياكلوا مسبك . اية رأيكم بقة ؟؟؟ بزمتكم لو الفرنساوين كانوا فضلوا مش كانوا نضوفها ؟؟؟
