استضاف الإعلامى عمرو الليثى، أمس الأول –الأحد- فى برنامج «أنا»، عائشة عبدالهادى وزيرة القوى العاملة والهجرة، وهو البرنامج الذى يتحدث الليثى خلاله مع ضيوفه عن حياتهم الخاصة، حيث يقسم الأسئلة إلى خمسة أجزاء، ويطلب منهم تقييم مدى تحقيق الحاجات الأساسية والأمان والاستقرار والحب فى حياتهم، لتكون الدرجة من «20». خلال الحلقة أكدت عبدالهادى أنها لا تنام بطريقة منتظمة حيث يصل عدد ساعات النوم فى اليوم إلى 4 ساعات، وقالت: «اتعودت على كدة خاصة عند اتخاذ قرار يتعلق بالوزارة مش بعرف أنام بقعد مربعة كده فى السرير أفكر، وممكن لو نمت أحلم به، ودايما جنب السرير ورقة وقلم أدون الملاحظات اللى بتيجى على بالى، ونتناقش فيها أول لما أوصل المكتب». وقالت الوزيرة عن الأكل: «الواحد مبقاش زى زمان بياكل بشهية مفتوحة دلوقتى تاكل عشان تاخد الدواء المعين، ولو حد سألنى عاملة دايت أقول آه، عاملة (غلب دايت)، ودة نوع من أنواع الريجيم اللى بيخسس. وعن شعورها تجاة كرسى الوزارة قالت: «لا أشعر بالخوف ولا ينتابنى أى نوع من أنواع الخوف أنى أسيب الوزارة، لأن ده تكليف وأهم حاجة إنى أعمل كل اللى علياَّ وكل شىء بأمانة وضميرى يكون مرتاح، لأن الكرسى فى زوال، ولو بكرة آخر يوم ليّا فى الوزارة هاعمل مكافأة لكل العاملين، وأبعت ورد للوزير الجديد، ولو عرض عليا أشتغل معاه مستشارة هوافق بس من غير فلوس». وعن الشعور بالثقة بالنفس قالت: «شعورى إنى مكملتش تعليم أعطانى دفعة لأكون أفضل بتثقيف نفسى واتعلمت لغة وكمبيوتر، على الرغم من إحساس الناس تجاهى إنى مش مكملة تعليمى». وذكرت موقفاً يدلل على ثقتها بنفسها فقالت: «مرة كان مطلوب منى أعقب على ندوة لكاتب صحفى كبير وأنا قاعدة حاسة إنه بيقول مين دى اللى جاية تتكلم، وعند وقت التعقيب، فكرت بسرعة واسترجعت كل المعلومات اللى عندى ووقفت، ولفت النظر لى بطريقة مدهشة أدهشت الجميع». وعن سؤال البرنامج: هل الزوج ممكن يضحى فى سبيل نجاح زوجته؟! ردت عبدالهادى: «لا، مفيش راجل مصرى يعمل كده، وبعض السيدات خاصة بعد الفشل فى الحياة العاطفية يعتبرون التفوق فى الحياة المهنية مسألة حياة أو موت باعتباره تعويضا للحياة العاطفية».
