بعد ماعملوا اول ثورة شهد لها العالم شرقه وغربه . كرهوك فى مبارك وقالوا فاسد وانتهت صلاحيته من زمان . قالوا هو المسئول عن الفقر والجهل والمرض اللي سكن اجساد المصريين خلال 30 سنة بالكمال والتمام . وهو اللى ورا كل المصايب اللى حلت بالبلد ومنها غرق العبارات وعنوسة البنات وبطالة الشباب و و . وكرهوك فى مرات مبارك وقالوا هى سبب الوكسة والحوسة والكحورة . وهى اس الفساد للراجل وولاده . وهى اللى سلمته للقضبان تسليم اهالى . وكرهوك فى علاء وجمال وقالوا دول بقى السبب فى اللى حصل . كانوا عاوزينها عزبة وتكية ليهم ولاولادهم من بعدهم .. شوف ازاى. وكرهوك في حاشية مبارك من صفوت لسرور للعادلى . وقالوا عنهم حرامية برده وفاسدين وكانوا عاملينها دولة جوه الدولة لولا رحمة ريى . وكرهوك في ناس كانوا نجوما واتخسف بيهم الارض بقدرة قادر وسبحانه المعزالمذل . كرهوك مثلا فى ابو اسماعيل صاحب شعار حنبقى كراما . وقالوا لك هو نصاب ومزوروكان عاوز يبقى رئيس وهوامريكانى اصلى. هى العملية ناقصة. وكرهوك فى شفيق وابو شفيق وحاكوا له بدل القضية قضايا . وبعد ايام وشهور براوه. وطلع منها زى الشعرة فى العجين . وليه عند الدولة فلوس كمان . شوف ازاى. وكرهوك في حمدين وقالوا مش نصير الغلابة ولا حاجة ده كارت محروق . وهو مش واحد مننا . ده واحد خمنا. وكرهوك فى رجالة وستات وبنات 6 ابريل وبعد ما كان بعضهم ايقونة الثورة بقى يا حرام اما منبوذ او فى طره . وكرهوك فى النشطا واللى لا مؤاخذة متلونين. وقالوا دول قابضين وبايعين للوطن عند اول ناصية . وكرهوك فى اليساريين والليبراليين والاحزاب اللى طلعت من غير مناسبة .وقالوا دول ولا ثوار ولا حاجة . دول رجعيين ومنتفعين وبرده قابضين. شوف ازاى . وكرهوك فى حزب النور . قالوا ده رجالته جايين من العصر الجاهلى . ولا بيعرفوا دنيا ولا دين وانتهازيين . واذا لاقدر الله حكموا . حيقطعوا عنا الميه والنور . وكرهوك في الاخوان وخلوها ارهابية بقوة القانون . واللى حيمشى فى مظاهرة ليهم يا ويله . وكرهوك في الفضائيات ورجال ومذيعى وضيوف الفضائيات.وقالوا اللى شغالين فيها عبيد القرش والمم والسبوبة . وعاوزين يولعوها حريقة . وكرهوك فى شباب وشابات الجامعة . قالوا انهم شوية عيال سيس وبلطجية ومش متربيين ومش بتوع علام . وكرهوك فى الشرطة والجيش وشككوا فى اللى حصل فى يوم 30 .قالوا ده انقلابا بامتياز . شوف ازاى . وبعد كل ده وده وبعد ما كرهوك فى العيشة واللى عايشينها . ايه اللى فاضل غيرى انا وانت . وعليه العوض بقى فى ال90 مليون الباقيين ؟!