كل "لواء" وأنت طيب كل "لواء" وأنت طيب بمناسبة انتهاء برلمان اللواءات ممثلي الحكومة فقد عشنا السنوات الماضية نهرب من اللواء في المديرية فنجده في العمارة ونهرب من العمارة فنجده في البرلمان يبارك ما حدث ويبرر ما كان.. كان الضوء خافتاً داخل عنبر المستشفي وعلي سرير عم "عباس" جلست "تفيدة" زوجته, وحماته "نظله" وأولاده وتمدد بجوارهم الحاج "سلامة" والأسطي "فتيحة" واللواء "هلباوي" شركاء عم "عباس" في السرير الحكومي.. وقال عباس لزوجته: - "عايزكم توقفوا لي أكبر محامي في البلد أنا لازم أخرج من المستشفي بأي طريقة".. قالت حماته: - "محامي ليه بعد الشر هوه انت جاي هنا في سرقة ولا مخدرات؟ ده انت جاي في عربية اسعاف قد الدنيا".. قال عباس: - "ما انتم ما تعرفوش حاجة, قول لهم يا حاج سلامة".. قال الحاج سلامة: - "الحكاية وما فيها ان كل يوم العصر بيحضر هنا في العنبر ظابط كبير ومعاه مجموعة من الظباط الصغيرين وبعدين الظابط الكبير يسأل دكتور العنبر (مين عندك النهاردة حالته تسمح بالتعذيب) واللي يشاور عليه الدكتور ياخدوه في أوضة النوبتجيه يعذبوه".. قالت تفيدة: - "ويعذبوه ليه؟".. رد الأسطي فتيحة: - "أصل الظباط الصغيرين لسه متخرجين وبيقضوا عندنا هنا سنة الامتياز, بيتدربوا علينا يعني".. قال اللواء "هلباوي" مدافعاً عن الحكومة: - "انت كده بتغالط لأن الضرب المبرح جزء من العلاج الطبيعي والمنطقة بتغلي والعنبر مليان ارهابيين وهات لي دولة في العالم كله مفيهاش عنبر أو علي الأقل سرير".. قالت نظله: - "مين الدلعدي ده يا عباس؟".. رد الحاج سلامة: - "ده لواء من بتوع مصر بتتقدم بينا ساعة في الصيف".. قالت تفيدة: - "مالكش دعوه بحد هنا خصوصاً الجدع ده بتاع البرلمان واستحمل لحد ما تعدي مدتك علي خير, واوعي تفكر تهرب لأنهم هيجيبوك وتعيد المدة من الأول".. قال الحاج سلامة: - "مايقدرش يهرب يا ستي من المستشفي ده عنده الشهر الجاي حقنة نوفالجين".. فقال اللواء "هلباوي": - "يا ست هانم دول ناس طماعين; عندك السرير ده مفروض انه مخصص لخمسة أفراد لكن الحكومة حاطه عليه أربعه بس وبتتحمل هيه الفرق".. قال عباس: - "ما هو فيه واحد مات".. رد اللواء "هلباوي": - "أديك قلتها بعضمة لسانك, فيه واحد مات, لو بقي الحكومة معانده معاكم وعايزة تقرفكم كان ممكن تفتح باب الترشيح وتجيب واحد بدل اللي مات, لكن سايباكم أنتم الأربعة تبرطعوا في السرير".. فقالت تفيدة: - "مين الجدع ده يا حاج عباس؟".. فقال عباس: - "ما قلت لك يا ستي ده واحد من بتوع مصر بتتقدم بينا للمزاد وبعد ما بيطلع "معاش" بيوهب نفسه في "قافلة" للمستشفيات والأوتوبيسات والمدارس والتجمعات يدافع عن الحكومة.. عمل خيري يعني".
