لو جبت جرايد 10 سنين فاتت وجمعت فرص التشغيل التي بتعلنها الحكومة حتلاقي مفيش ولا فرصة عمل فاضية ولا فيه نسبة بطالة.. لأن الواحد في الحالة دي بيشتغل شغلانة واتنين وتلاتة وتلاقي الستات بتشتكي لأنها ماشافتش أجوازها غير طشاش من 4 أيام. عشان كده بنقول: لو عايز تتعامل مع الحكومة.. ماتركزش.. لأن المسألة زي حزام المرور اللي اتعمل عشان يحقق الانضباط.. ويحكم المواطن الذي يقود سيارة بأنه مش ملك نفسه به هو ملك من أول عسكري المرور وأنت ماشي ومثله الأعلي (من خاف سلم).. وامشي في طريقك عدل يحتار عدوك فيك.. بعيدا عن السامعين. ومع إن المصانع كتير والمشاريع أكتر.. لكن فيه جيل .. قول أجيال قربت لسن المعاش من غير ما تلاقي شغل.. لأ وإيه.. أصحاب المشاريع عايزين يجيبوا عمالة رخيصة من دول آسيا .. ليه يا جماعة؟.. يقولك العامل الآسيوي مطيع ومنجز ومطالبه مش كثير.. طب وشبابنا.. يركب مراكب ترميه علي أي شط في أوروبا لو حتي يشتغل بلقمته وسألت واحد عايش في إيطاليا عن الإجراءات اللي بتتخذ مع اللي عايمين.. قال لي حرس الحدود بينقذهم وبيلاقي أعمارهم السنية بين 14 و17 سنة فبياخدوهم لمراكز التأهيل ويطلعوا منهم صنايعية ينفع بيهم المجتمع الإيطالي.. طب أيهما أولي.. المجتمع المصري ولا المجتمع الأجنبي؟.. يعني نبعت ولادنا هناك.. وفي نفس الوقت نفتح للعمالة الأجنبية؟ يكونش ده هو (حوار الحضارات)؟