* * حسنين : رأيك إيه فى تصريحات وزير التنمية الاقتصاديه . عثمان . لما قال من أسبوع إن نسبة البطاله تراجعت لأقل من 9 % ؟ = = = محمدين : ما قال قبل كدا إن نسبة الفقر تراجعت والتضخم تراجع . خليه يقول إنت ناسى إن دا موسم انتخابات . ودى طبعا عايزه كل واحد فى الحكومه يطلع بقين إنجازات . * * حسنين : لكن جاب الكلام دا منين ؟ = = = محمدين : بص يا سيدى عدد سكان مصر 79 مليون السنا دى . بناخد منهم السكان إللى فى سن من 15 سنه حتى 64 سنه ودول بنسميهم السكان فى سن الإنتاج . وبعدين نشيل منهم الطلبه وستات البيوت . يتبقى حوالى 25 مليون نفر . دول بنسميهم قوة العمل . * * حسنين : طيب هو جاب نسبة البطاله دى إزاى ؟ = = = محمدين : هو بيقول إن عدد العاطلين فى مصر حوالى 2 مليون و400 ألف شخص . لما تقسم عدد العاطلين بتوعه .على قوة العمل إللى هما 25 مليون شخص . تطلع النسبة 9 % زى هو ما بيقول . * * حسنين : لكن إزاى حسب عدد العاطلين ؟ = = = محمدين : هو حاطط تعريف للعاطل . بيقول إنه الشخص القادر على العمل . وإللى عايز يشتغل . وبيدور على الشغل لكن موش لاقيه . * * حسنين : ودول أقل من إتنين ونص مليون زى ما بيقول ؟ ما أنت شايف بنفسك الأقارب والجيران والمعارف إللى موش لاقيين شغل أد إيه . = = = محمدين : أصله قال إن اللى ها يشتغل لمدة ساعه فى الأسبوع . دا ما يعتبرش عاطل . يعنى عمال التراحيل إللى قاعدين فى الميادين كل يوم بيدوروا على شغل . لو الواحد فيهم إشتغل ساعه فى الأسبوع . بكدا ما يدخلش فى عدد المتعطلين . * * حسنين : بس أنا أسمع إن العمل أنواع عمل دائم وعمل مؤقت وعمل موسمى وعمل متقطع . = = = محمدين : شوف الوزير إعتبر إن كل الأنواع دى مشتغلين موش متعطلين . لأن كل واحد من دول بيشتغل على الأقل ساعه فى الأسبوع . * * حسنين : يعنى الخريج إللى بيكتب يفط فى مواسم الانتخابات كعمل موسمى دا مشتغل . وإللى بيشتغل يوم وثلاثه لأ دا مشتغل . عجايب ! = = = محمدين : دا حسب رأى السيد الوزير . علشان كدا هو شايف إن نسبة البطاله كانت أعلى من 11 % سنة 2005 . وبعيد نزلت السنة إللى بعدها لفوق العشرة فى الميه . والسنه اللى بعدها نزلت لأقل من 9 % . ووقت الأزمة العالميه طلعت شويه صغيرين . بقت 9 وأربعه من عشره فى الميه . وبعدين نزلت فى الشهور الأخيره لأقل من 9 % مره تانيه . * * حسنين : والبطاله عامله إيه فى البلاد إللى حوالينا ؟ = = = محمدين : شوف ياسيدى السعوديه رغم البترول والعز البطاله كانت عشره ونص فى الميه السنه إللى فاتت . فى تونس أكثر من 13 % فى الأردن 13 % . فى الجزائر رغم تصدير البترول والغاز الطبيعى فوق العشره فى الميه . * * حسنين : والبلاد الأوربيه عامله إيه ؟ = = = محمدين : فى شهر سبتمبر إللى فات البطاله كانت أكثر من 20 % فى أسبانيا وأسبانيا دى الاقتصاد الثامن فى العالم . فى سلوفاكيا قربت على 15 % . فى أيرلندا فوق ال 14 % فى اليونان فوق ال 12 % فى فرنسا 10 % . لدرجة إن المتوسط العام البطاله فى دول منطقة اليورو . ودول 16 دوله بتتعامل كلها بعملة اليورو فوق العشره بالميه . والمتوسط للبطاله فى دول الاتحاد الأوربى ودول 27 دوله . تسعه وسته من عشره فى الميه . ودى نفس النسبه فى أمريكا فى نفس الشهر . * * حسنين : يعنى إحنا أحسن من السعوديه وأسبانيا وفرنسا وأمريكا ؟ = = = محمدين : موش كدا وبس . إحنا البطاله عندنا بتنخفض . لكن البطاله فى أسبانيا وفرنسا وأيرلندا وسلوفاكيا نسبتها بتزيد . * * حسنين : لكن نسبة البطاله بتاعتهم عامله إيه فى الريف المصرى كام يعنى ؟ = = = محمدين : البطاله فى الريف السنا دى أقل من 7 % . وفى المدن أقل من 12 % وطبعا متوسط الإثنين يطلع أقل من 9 % . إللى هو الرقم الرسمى للبطاله بالبلد . * * حسنين : والبطاله بتاعتهم فى الحريم أكثر ولا فى الرجاله ؟ = = = محمدين : النسبة الرسميه بتقول . نسبة البطاله بين الرجاله حوالى 5 % بس . لكن بين الحريم 23 % . وطبعا المتوسط للإثنين مع بعض 9 % . لأنهم بيقولوا إن عدد المتعطلين من الرجاله 993 ألف من الذكور . يعنى أقل من المليون نفر . وعدد البطاله فى الحريم 1 مليون و355 ألف من الإناث . * * حسنين : لكن مفيش حد تانى بيحسب نسبة البطاله فى البلد ؟ = = = محمدين : محدش يقدر . لأن جهاز الإحصاء إللى تابع للوزير عثمان هو اللى محتكر عمليه حساب البطاله . لكن فيه حسبة تقدر تطلع بيها . فاكر لما قلت إن العمل أنواع دائم ومؤقت وموسمى ومتقطع . هم نفسهم قالوا نسبة العماله المؤقته من قوة العمل حوالى 7 % . ونسبة العماله الموسميه حوالى 4 % من قوة العمل . ونسبة العمالة المتقطعه حوالى 16 % من قوة العمل . يعنى مجموع الثلاثة أنواع 27 % من قوة العمل لو ضفت ليهم النسبة الرسميه للبطاله إللى هى 9 % . يطلع المجموع لكل الأنواع حوالى 37 % من قوة العمل . ودا من كلامهم . * * حسنين : طب إيه حكاية فرص العمل اللى بالآلاف الى بيوفروها كل سنه . إحنا موش م البلد دى ولا إيه ؟ = = = محمدين : الوزير نفسه . عثمان . بيقول فى تقريره بتاع متابعة خطة السنة الماليه اللى فاتت 2009/2010 . إنه تم توفير 521 ألف فرصة عمل خلال السنه . وشوف الدقه 304 ألف فرصه منهم تمت من خلال مكاتب التشغيل بتاع القوى العامله بالمحافظات . و169 ألف فرصه وفرتها شركات القطاع الخاص والشركات الاستثماريه . و48 ألف وفرتها شركات إلحاق العماله بالخارج . * * حسنين : يعنى لو قسمنا الفرص بتاعة مكاتب القوى العامله على عدد المحافظات . يطلع نصيب كل محافظة أقل من 11 ألف فرصة عمل فى السنه . كمان بيحسبوا عدد المتدربين فى مراكز التدريب الحكوميه وبيعتبروا إن دول اشتغلوا بعد التدريب . كمان كل واخد قرض من صندوق التنمية المحليه بيعتبروه عمل مشروع . وإنه شغل فيه واحد ولا اتنين معاه وبيضيفوا دا للحساب . علشان كدا فرص العمل كتيره زى ما أنت شايف . لدرجه إنها زادت بنسبة 14 % عن السنه اللى قبلها . ! [email protected]
