هاتكلم معاكو النهارده بالبلدي لغة أهل بلدي وهاقول: افرحوا يا مصراوية علي أنغام السمسمية.. افرحي يامصر ياغالية يا أم الصابرين يا أم المكافحين.. افرحي يا مصر يا أم الشهداء اللي ماتوا لكن بحق ربنا صاحيين.. علي الملحمة شاهدين.. ملحمة شعب وإرادة أمة واصرار قائد وعد وأوفي.. قالها القائد من سنة زي النهاردة هانتقابل علي شط القناة الجديدة واتحققت الأسطورة بسواعد المصريين.. هو التحدي مش بناء القناة ولكن التحدي هو إرادة الشعب اللي ضحي بالدم والعرق علشان نحقق لبلدنا الحياة.. علي فكرة اللي بيجري في القناة مش مية زي مانتو فاكرين دا عرق ودم المصريين أحفاد الأجداد المخلصين اللي شقوا القناة من سنين.. ياللا يا ولاد بلدي نغني ونفرح.. لكن مش هاننسي في غمرة فرحتنا شهداءنا اللي استشهدوا علي ضفة القناة من سنين.. مش هاننسي شهداءنا في سينا اللي ضحوا بحياتهم علشان يحموا بلادنا من الإرهاب.. مش هاننسي وسط فرحتنا الرجالة الصامدين السهرانين بعيون مفتحين للغدارين إلي خانوا بلادهم وباعوا نفسهم للشياطين.. لأ دي مش بلدهم ولا هما مننا دول أشرار ولاد شياطين .. علشان كده رجالتنا ليهم صاحيين وايدهم علي الزناد وبصيحة الله أكبر منتصرين رغم ألاعيب الأبالسة ولاد الشياطين.. المهم بكره.. بروح القناة الجديدة نكمل فرحتنا نكمل خطتنا.. علشان بلدنا تكبر وتبقي قد الدنيا زي ما قال ريسنا.. واحنا وراك يا قائدنا معاك مكملين علي الفساد قادرين هو ده الشيطان الرجيم اللي مش عاوز الخير للمصريين.. من بكرة نبدأ العمل علشان الناس الغلابة والأمهات الثكالي علشان عم حسن وأم صابر وبهية.. علشان ولادهم يبقوا محامين ودكاتره ومواطنين صالحين مش إرهابيين.. بلدنا هاتبقي حلوة بأرضها الخضرا وناسها الطيبين وبالقانون يتطبق علي كل المصريين.. أيدنا في ايدك يا ريس ومعانا ربنا.. إن شاء الله منصورين.