قضت محكمة جنايات القاهرة المنعقدة بالتجمع الخامس، بمعاقبة اليوتيوبر أكرم سلام بالحبس سنتين لاتهامه باستعراض القوة وحيازة سلاح ناري ومخدرات بمنطقة المقطم، والتعدى على سيدة المقطم وإجهاضها. أحالت النيابة العامة اليوتيوبر "أكرم سلام" وآخرين لمحكمة الجنايات المختصة بدائرة محكمة استئناف القاهرة، بعد أن وجهت إليهم تهمة التعدي على سيدة بمنطقة المقطم، وذلك علي خلفية التحقيقات في القضية 1694 لسنة 2024 جنح المقطم. اقرأ أيضا| تأجيل محاكمة «مسلم ونور التوت» بسبب سرقة لحن أغنية لجلسة 2 يوليو واستمعت النيابة العامة لأقوال المجني عليها ضحية الضرب من المتهمين: اللي حصل أن عندي قناة عرض محتوي على موقع التواصل الاجتماعي يوتيوب وبنزل عليها فيديوهات طبخ وبعد كده واحدة اسمها ليلي توصلت معايا وبقينا أصحاب وساعتها كنت محتاجة حد يديرلي القناة الخاصة بيا على اليوتيوب وبعدها عرفتي على واحد اسمه احمد موسي هو اللي بيدير القنوات بتاعة اليوتيوب وكان بيديرلي القناة فعلا ولما كانت بتجيلي أرباح وكنت بحوله النسبة بتاعته وبعد كده حصلت بينا خلافات وأحمد موسى ده على صلة ب أكرم سلام وفضلوا يحاولوا يوقفولي القناة بعد ما حصلت بيني وبين ليلي خلافات وتابعت المجني عليها في أقوالها امام جهات التحقيق: الكلام ده حصل يوم 28/1/ 2024 حوالي الساعة 4 مساء من بيتي في عمارة 2 من ميدان النافورة المقطم، وقتها أنا كنت راجعة من السوق وبركن عربيتي وطالعة البيت، وكان معايا ابني الصغير، أنا بعد ما ركنت عربيتي وندهت على البواب لقيت حد ب ينده، وبيقول يا نجلاء، ولسه بلف عشان أشوف مين ب ينادي لقيت حد رش حاجة فوشي، والحاجة دي جت في عيني فمكنتش قادرة أشوف حاجة، وبعدين لقيت اللي ب يضربني ومسكني من شعري وشدني لورا. وأضافت: وعشان كدا أنا محستش هو ضربني كام ضربة بس هو كان ماسك شعري وأنا بحاول أجري منه، بس أنا مكنتش حاسة بحاجة من كتر الحرقان اللي في عيني، وكمان عورني في إيدي بآلة حادة، بس أنا معرفش إيه هي لأني مكنتش شايفة من اللي اترش في عيني، وأنا وقتها لقيت كل الناس اللي في الشارع اتلمت وجريت وراه وهو جري منهم بعربية كانت واقفة وفيها ناس تانية وأول ما ركب هربوا بسرعة، وبسبب الضرب اللي اتعرضتله حصلتلي إصابة بجرح قطعي في إيدي الشمال وخيطوا الجرح 18 غرزة، ومتعورة في الصباع الأوسط لا يدي اليمين وخيطت الجرح بأربع غرز ولما روحت حسيت بكدمات في راسي وظهري واجعني. كانت محكمة الاستئاف المنعقدة بمجمع محاكم زينهم، في جلسة يوم الأحد الماضي، حددت جلسة اليوم 28 مايو أولى جلسات محاكمة اليوتيوبر أكرم سلام لاتهامه باستعراض القوة، وحيازة سلاح ناري ومخدرات بمنطقة المقطم. وأمرت نيابة المقطم والخليفة الجزئية، بإحالة المتهم اليوتيوبر أكرم سلام، للمحاكمة الجنائية أمام محكمة الجنايات؛ لاتهامه باستعراض القوة وحيازة سلاح ناري ومخدرات بمنطقة المقطم، التابعة لمحافظة القاهرة. وتعود أحداث القضية إلى شهر فبراير الماضي، حيث تلقت الأجهزة الأمنية بلاغاً من سيدة تتهم اليوتيوبر أكرم سلام وآخرين بالاعتداء عليها وإصابتها بمنطقة المقطم؛ لوجود خلافات بينهما حول نسبة الأرباح الخاصة بقناة المبلغة على موقع التواصل الاجتماعي يوتيوب، المتخصصة في المأكولات.
