احتفلت اسما شريف منير باليوم العالمي للرجل عبر حسابها ب موقع التواصل الاجتماعي إنستجرام. ونشرت أسما شريف منير صورة لوالدها وعلقت قائلة: "ديمًا بنسمع عن اليوم العالي للمرأة وعن عيد الأم بس مش ناس كتير بتهتم اليوم العالمي للرجل ولا عيد الأب، انهاردة 19 نوفمبر هو اليوم العالمي للرجل وعشان كده دي فرصة أحب فيها، وأقدر الرجال اللي في حياتي أهمهم 4". كما قالت أسما: "رقم 1 دائمًا وأبدًا أبويا حبيبي، سندي وضهري، قاسي ولين، دايمًا في ضهري وتعب عمره كله عشاني أنا وإخواتي، حرم نفسه من حاجات كتير عشان يعلمنا ويخلينا في مستوى كويس وده كان دايمًا ضغطه في شغله، أحن وأطيب رجل في الدنيا رغم أنه عصبي وحمقي، راجل محترم والناس حبتنا بسببه، ربنا ما يحرمني منك ويديك الصحة ومشوفش فيك حاجة وحشة ابدا". وأضافت: "ثاني اهم راجل في حياتي هو جوزي وحبييي، رفيق الكفاح و النجاح، عصبي زي أبويا بالظبط، ناري بس مفيش في طيبة قلبه، بستمد طاقتي منه لاني مشفتش و لا هشوف حد مصّر ينجح كده، جدع و مكافح، رغم اننا ناقر ونقير بس مقدرش اتخيل حياتي من غيره، ضهري برضة و حب حياتي، يا رب تحقق كل اللي بتحلم بيه لأنك تستاهل كل حاجه حلوة في الدينا، ربنا يخليك ليا و يرزقني ب طفل مجنون زيك، بجد بحبك". وواصلت أسما: "وليد صلاح، زوج عمتي وأبويا التاني، الجندي المجهول، الرجل ده مفيش حد جدع زيه، لما امي توفت ساب بيته هو و عمتي و عاشوا معانا عشان ياخده بالهم مننا لحد ما اتجوزت و اخويا اشتغل، 10 سنين، حب واحتواء وحنان، هو اللي ديمًا كان بيشجعني علي الشغل و يبهدلني لو قعدت فاضية مش ورايا حاجة، كان و مازال مهتم بكل تفاصيل حياتي، وجودوا في حياتي انا وأخويا فرق في كل حاجة في حياتنا، ربنا يخليك لينا يا اجدع راجل في العالم". وتابعت أسما شريف منير: "اخويا او ابني فؤاد، مفيش حد طيب زيه، ده ابني وحبييي وأخويا، كل الناس الطيبة في كفة واخويا في كفة تانيه، فنان موهوب وأحن أخ، بحبك يا حبيبي، يا رب أفرح بيك ديمًا و ينجحك و تحقق كل اللي بتتمناها". واختتمت : " خدوها فرصة و عبروا عن حبكم وامتنانكم للرجال اللي في حياتكم.. الرجولة هي ثقافة النظرة وسط جهل العيون وهي حضارة الكلمة وسط الصمت، وهي الذراع التي تمتد لتحمي، والعقل الذي يفكر ليصون، والقلب الذي ينبض ليغفر كل سنة وكل راجل حنين، طيب، سند وضهر، حماية وحب ديمًا رجالتنا و حمايتنا". أقرأ أيضا: محمد محسن وهبة مجدي يشعلان حفل باريس ب«أهواك»
