لا أعرف حقا كيف يمكن.. أن يوافق البسطاء والغلابة والمهمشين.. والمنتظرين.. لوهم اسمه العدالة الاجتماعية.. علي دستور »ترك« حقوقهم عمداً ومع سبق الاصرار في مهب الريح.. ونمسكها مادة.. مادة.. يقول الدستور.. لافض فوه.. الرعاية الصحية حق لكل مواطن.. (يا راجل عيني في عينك كدة.. يا كداب)، وتخصص له الدولة نسبة من الناتج القومي (منين يا دلال.. هي لاقية تاكل).. وتلتزم الدولة بتوفير خدمات الرعاية الصحية والتأمين الصحي وفق نظام عادل وعالي الجودة (تاني.. حنكدب.. طيب ما نسأل المواطنين هي المستشفيات بيطلبوا منهم يشتروا ايه ولا اية لعلاجهم).. يعني من الآخر مفيش علاج.. مش اشكال.. طيب ناخد اللي بعده .. بالنسبة للعمل.. يقول الدستور.. العمل حق (زغرتي ياللي ما انتش غرمانة).. وواجب وشرف تكفله الدولة (مال الدولة والشرف.. هي الشغلانة ايه بالظبط).. وعلي أساس مبدأ المساواة (اكيد قصدهم في الطول) وتكافؤ الفرص (يعني مافيش شغل).. طيب وبالنسبة للتعليم.. يقول الدستور.. لكل مواطن الحق في التعليم (سلامتها أم حسن).. وده جالها من ايه؟ وهو مجاني بمراحله المختلفة (دي تهيؤات والا العالم دي مش عايشين معانا اصلا.. دي البت المفعوصة بيخدوا عليها آلاف في الحضانة).. وادي كمان التعليم بلاشه.. طيب بالنسبة »للسكن«..، لا دي بقي مادة مش حتقدر تتكلم ولا »تكح« فيها.. يقول الدستور.. بس والنبي بلاش تضحك.. السكن الملائم والماء النظيف (قصده المخلوط بالصرف الصحي ولا من الترعة).. والغذاء الصحي (قصدهم السوتيه).. حقوق مكفولة.. (الصلاة علي النبي كل دي حقوق مكفولة.. والا احنا اللي لابسين »كافولة«.. وبينضحك علي خيبتنا).. بلاش من المادة دي.. نشوف حاجة تانية.. آه.. فيه مادة جامدة جداً خالص ودي لو طبقناها حتحل كل المشاكل اللي عندنا.. بصراحة ربنا يكرم اللي كتبها.. بجد.. حاسس بمعاناة الشعب اللي مش طايق نفسه من الغلاء ومن زيادة الأسعار اللي »مهربدة« عيشته، ومن مرتبه اللي مش مقضيه ليوم سبعة منه.. تقول المادة.. ممارسة الرياضة حق للجميع.. هي.. هي.. هي!!.. (والنبي مكتوب كدة.. أنا مالي).. طيب بلاش دي.. اهي يا سيدي .. تقول المادة لكل شخص (المرة دي ما قالش لكل مواطن.. واخد بالك.. احتمال ان شخص دي كلمة مش عربي أو مترجمة).. الحق.. في ايه.. في بيئة صحية سليمة. (بجد من غيرك.. يادولة الواحد مش عارف كان حيعيش ازاي.. إلهي يا رب يخرب بيوتكم يا بيئة).. نشوف مادة كمان تهم الناس.. أهي.. مادة ما تخرش المية.. مش عارف ازاي ما شفتهاش من الأول.. كانت وفرت علي »التريقة«.. علي الدستور.. بجد المرة دي مش هزار.. وماتتوقعش انها مادة كدة ولا كدة.. لان فيها اكبر تأمين لمستقبل عيالك.. ودي بقي مادة الزامية لا فيها لف ولا دوران غصب عن ابوهم حيطبقوها.. يقول الدستور »لكل طفل« فور الولادة.. اسم مناسب!! (ابوس رجلك ما تقولش اللي في نفسك ماينفعش هنا اقول كلام قبيح.. بس كانت ناقص يقول وان الأم من حقها تولد وتبيض.. حرية بقي).. وبالنسبة للأم.. قال الدستور تكفل الدولة خدمات الأمومة والطفولة (يعني الدولة اللي حترضع) والتوفيق بين واجبات المرأة وأسرتها (يعني حتساوي السراير وتلم الغسيل) وطبعا بعد الأطفال حتسأل عن الشباب.. كل حاجة معمول حسابها في الدستور بس بصراحة المادة الشبابي.. دي انا مش فاهمها.. بتقول تكفل الدولة رعاية النشيء، والشباب.. لغاية هنا شغال.. اللي بعدها بقي بتقول.. ان الدولة حتنميهم.. روحياً (يعني اللي الدولة حتقوله يا أوحي.. يبقي اتنمي خلاص).. ودي بصراحة آخر مادة احب اختم بيها كسبب في عدم موافقتي علي هذا الدستور.. »ودمتم«!!