أمي البحيرة ف الجنوب وأنا لسه طفل بيتولد ويا الغروب جنين بيلقط ف النفس.. يرضع يادوب! والشمس بتشد البدن للاستوا عند الجنوب باحبي أنا بين الجبال بين التلال كمبالا أول رحلتي واسرح يمين واسرح شمال آسية يادنيا ف غربتي! واكبر يادوب واصبح صبي ومابين غابات مستنقعات باسرح ساعات ما أقدرش أقول ف الوقت ده إيه مذهبي؟ عند الروافد والسهول ممكن أغازل كل شيء ممكن أقول والقول يطول... وبابص فوق بحلم تنور نجمتي أبيض بقيت ولايوم نسيت ساعة الأصيل أصبحت نيل شبيت خلاص وبقيت فتي فتح عيونه ع القمر لما انتشي شاف المشارف ع الحدود قام قلبه باح بالوشوشه ريحتك يامصر هزته ريحة الحسين والقلعة والأهرام ورمسيس والقمر فادحرجت من فوق كتافه صخور قلق ومعاها وحل وطين عرق..طول السفر ودخلت أول بوابات الإبتدا واما خلق رب العباد خلقه علي وجه الوجود اتجمعت كل البشر تصنع تاريخ تحضن وتر ويكون لها ماضي ومستقبل ويوم وبيندفع نهر الحقيقة تموت هموم يلمس بدوق بلسانه أملاح الخلود يامصر يا أرض الخلود كل اللي يشرب ميتك لازم يعود! النهر جوه العين بريق أبريق جميل بنشيله تحت الباط صديق حابي وبنحابي عليك ما انت الحبيب وانت الأمير علشان كده بنحن ليك مصر الأصيلة ربتك صنعت علي ضفافك حضارة وروايات مصر ادتك حريتك علمت مدن قامت سدود مع خزانات فاخضرت الأرض السواد معاها اخضرت بلاد... صحيت قلوب رقصت غصون ماتت آهات يانهر يااللي علي موجك نام الرضيع موسي ياعقد ياأسوره بيك مصر محروسة يانهر قلبك حياة مليانة حنية يانهر جوة العيون سجادة فضية يانهر فوق اللسان والقلب أغنية نفسي احضنك مليون سنة ما انت الريحان والفل إنت السوسنة من حبي فيك أنا نفسي اقول.. إنك أنا إنك أنا النيل أنا!! طلعت سالم محطة توليد كهرباء أبو سلطان الإسماعيلية