«حنان» التى تبلغ من العمر 11 عاماً كان من المفترض أن تكون فى عداد الأطفال، ولكن سيرة حياتها وأعوام عمرها القليلة تقول غير ذلك، تقول حنان: أنا فى الصف السادس الابتدائى، أبويا بيشتغل بواب، بس عنده السكر وعيان، ولى 8 إخوات، أسماء 18 سنة، وأميرة 17 سنة، ودول اتجوزوا والحمد لله، وعبد الناصر 16 سنة بالصف الأول صناعى، ومحمد 13 سنة بالصف الثالث الإعدادى، وأحمد 4 سنوات وأزهار 3 سنوات. يومك بيمر إزاى؟ - كل يوم بأصحى من الساعة 6 وأطلع أنضف الشقق فى العمارة وأشترى الطلبات للسكان، وبافضل لحد الساعة 12 على كده، بعدها بأقوم أجرى أغيّر هدومى وأروح المدرسة، وأرجع على الساعة 4 العصر، ويادوب أعمل واجباتى بسرعة، علشان أحصّل شغلى فى المكتبة اللى جنب البيت. مبتحسيش بالتعب يا حنان؟ - لما بتيجى الساعة 11 ونص طبعاً باكون هلكانة مش تعبانة، بس أنا باحب أبويا وأمى وبعمل ده كله علشان نقدر ناخد شقة ونسكن فيها، وكمان أنا محتاجة 50 جنيه كل شهر علشان المجموعة، وأبويا مش بيقدر يدفعها، لأن كل راتبه 120 جنيه، وأنا بيطلع لى فى اليوم 10 أو 15 جنيه بساعد بيهم. أنا باحب إخواتى، بس فيه ناس كانت بتقول لأبويا مش كنت جبت لك عيل ولا اتنين كفاية علشان تعرف تعيشهم، بس هو قالهم إن العيال عزوة والخير على قدوم الواردين! لمعلوماتك... 2.7 مليون طفل عامل، تتراوح أعمارهم بين السادسة والرابعة عشرة فى مصر, يعملون أو يتم استغلالهم فى أعمال عنيفة، ويتعرضون للاغتصاب أو القتل وانتهاك طفولتهم.