كل شوية بنشوف إضراب أو قطع طريق على قطر ماشى بحساب مبقاش فينا أعصاب ينهش لحمك كل شوية غُراب أو ديب قريب أو غريب بيكَسر يامه عليكى الباب مبقاش فينا أعصاب نشوف خدك من دمعك داب مبقاش فينا أعصاب نشوف عيونك المحبوبة مرعوبة من الأحباب استحملتى يا أمى كتير من الصغير ومن الكبير ولا سألتى ولا قولتى إيه الأسباب مبقاش فينا أعصاب نسيبك كده متنكده وإنتى اللى كنتى متبغددة ومتستتة ومتسيدة ومتعددة الخُطاب 30 سنة خلوكى تراب سرقوكى ولادك وخانوكى وحرقوكى ورموكى على الإسفلت وسألت ليه كدة؟ قالولى مش حنسيبها إلا خراب وكأنه تار بايت ضدك مادد جذره فى أرضك ولا فات فايت سترك يامه بهدمه ولا بكلمة من الأصحاب رميت وجهى فى كفوفى وداريت كسوفى وبكيت من خوفى ومن حُزنى ومن قلبى المتعب عذاب واستنيت منك كلمه يامه أو نظرة فيها عتاب أو حساب أو عقاب سبتينا نقَطَع بالسكينة يا مسكينة وإنتى حزينة وغرقانة فى همومك سبتينا نولع فى علومك سبتينا نقَلع فى هدومك وقلوبنا الحاقدة الجامدة واقفة تتفرج وفاتحة الباب ناسية إن الدنيا كلها مستنية تنهش لحمك كل شوية وترمى لإبنك الفِضية لاجل يخطط ويتخبط ويكتب بإيده القاسية جواب يبعته ليهم ويرسيهم ويخليهم يعرفوا عنك كل خطاب مبقاش فينا أعصاب مش عارفين إيه اللى وراك يا سحاب مطر ؟ قمر؟ حتى الشمس متاخدة غياب كل شىء حوالينا ضباب خدينا فى حضنك يامه ضمينا دفينا يامه أرجوكى ضمينى والا خلاص مبقاش عندك إنجاب مكنش عود ثقاب ولعته ورميته عليك يامه وقلت خلاص مبقتش مهمه أصل أنا قابض وبعت خلاص بِعتك يامه لاجل مهمه بِعتك يامه لأقل الناس الطبال والمحتال واللى إتعال على قيمتى وداس دفينى أنا محتاج لك والله بدينى سيبك من هبلى وعبلى وعبطى كل ده كان له أسباب أكَلونى م الزبالة (الزبالة) شربونى م المجارى (المجارى) سكنونى فى القرافة (القرافة) وعاشوا هُما فى الأيافة اترميت فى القبور وعاشوا هُما فى القصور وكرهتك وكرهت الدنيا يامه بس انا محتاج لك ضمينى أو اضربينى اضربينى يامه بالقبقاب اشنقينى يامه بس سامحينى الناس مبقاش عندها أعصاب فاض بيها يا بهية م اللى جرالهم واللى جرالك كل شوية من ناس مكنوش أحباب مرميين دى الوقتى فى ركن فى سجن وفاضل لهم أذناب بيدنسوا كل المحراب محرابك يامه يا طاهرة يا شريفة يا عفيفة يا نضيفة يا اسم اتزان بالقرآن يا اسم ميزان فى كل مكان يا اسم جميل ع النيل وبحور الرحمن كلنا عارفين قيمتك كلنا حافظين سيرتك وتاريخك المليان بالجدعان أجدع شبان.
