جه منين مصطلح.. ثورة مضادة؟ ضد مين؟.. وضد إيه؟.. وضد ليه؟ والمضادة.. عاوزة إيه؟ إللى فهموا كلمة مضادة.. يعنى حاجة واقفة جامدة، وواقفة صَادة يعنى حاجز بين حياتى.. وبين مماتى وكلمة شاردة يعنى نرجع للورا للخلف دور.. متفرقين مش أمة واحدة مين يجيله قلب.. ياخد قلب بلدى.. يرجعه لدنيا فاسدة مين يقول الضلمة ترجع تانى وكفاية ع الفجر النهارده يعنى نرجع نجمع أشواكنا بإيدينا.. ونقتل جوانا كل وردة يعنى ناكل حق بعض.. ناس تموت وناس تعيش.. قلوبها جامدة فهمتونى.. يعنى إيه ثورة مضادة؟ .......................................... أسْمَع الكلمة دى أقول مستحيل المضادة عاوزة تسرق حق جيل ضحى بحياته.. وقال يعيش بلدى الجميل أرضها ترجع لها.. ويِخْضَرّ من تانى النجيل وزرعها يِمِدْ لفوق وسط النجوم فى السما العالية يميل تيجى المضادة تقول.. مفيش زرع.. مفيش طرح.. مفيش نجوم.. مفيش نهار.. كله سواد.. كله ليل ................................................................... همّا إللى ماتوا.. كان عشان يتكتب مكان الاسم حى.. اسم الشهيد؟ وألا إدوا أعمارهم فدا.. عشان كلنا نرجع نعيش من جديد؟ الدم لسة يا دوب بيجرى من عروقهم فى عروقنا من الوريد للوريد كان كل أحلامهم نعيش.. ويسيبوا لنا الثورة فجر نوره خلى الدنيا عيد الشمس تطلع كل يوم.. تملى أحلامنا دفا والخير يا بلادنا يزيد تيجى دلوقتى المضادة تقول كفاية.. ارجعوا.. خلوا أحلامكم على قدكم حلمكم كان كبير.. كان بعيد ................................................ مستحيل.. مستحيل.. مستحيل المضادة مش هتسرق عمرى تاني المضادة مش هتاخد مننا أجمل أمانى نبقى أصحاب البلد بالعمل والمحبة والتفانى المضادة مش هتاخد منى مستقبل ولادى ارجع مغفل.. أو عبيط.. عقلى مقفول.. ما اتفتحش زى ما كنت أسمع كلامهم .. وألغى عقلى أمشى جنب الحيط أخاف الظلم، والسجن، والبطش الزمن عدى وفات.. هافضل مصحصح المضادة لازم تِمُوت.. ويشيلوها جوة نعش ................................................................. إللى صحى الحلم دا.. يقدر يرجّع ألف حلم والميدان.. لو نسيتوا.. لسة صاحى.. ما اتقفلش مفيش ميدان تانى بداله.. وما اتخلقش هامسك الثورة بايدى.. ودم الشهيد إللى ف وريدى دمه.. بينبض ما اتخنقش أيوة.. بينبض ما اتخنقش