يا شباب ثورة يناير اسمعوا صوت النفير الميدان فيه ناس كتيرة والندا يهدر هدير إحنا مش عاوزين مبارك ياللا قوم ارحل وطير الشباب اليوم بيطلب حق تقرير المصير الفساد عشش ومشش والبلد واقع ف بير بير ومش باين نهايته والشعور يائس مرير بس ليل الظلم دايما عمره مهما يطول قصير واللى ليل ونهار بيسرق إيده تتلف ف حرير صاحب القرية الذكية والغباء المستنير واللى كوش عالسياحة حطها ف كرشه الكبير مليارات زادت وعدت وإحنا مش لاقيين سرير واللى باعوا أرض توشكا منحه لسمو الأمير واللى ف الصحراوى قسم ف الأراضى وباع كتير والفلوس رحت ف بطنه وإحنا نمنا عالحصير واللى كان راعى التجارة أثرى من دم الفقير وأما يتكلم يقول لك لازم المركب تسير واللى خلى الأمن يضرب بالرصاص لازم أجير واللى خلى الأمن يهرب لما شاف الناس كتير واللى طلع بلطجية تزرع الرعب وتثير يغسل الأموال ويجمع مليارات من غير ضمير إحنا صوت الشعب واسمع الحساب حايكون عسير مش حاتلقى حد جنبك يسندك وتكون ضرير وافتكر قهرك وظلمك لما كنت ف يوم بصير ياللا سيبنا بسرعة وارحل مصر من غيرك بخير