المواطن برعى عبد المولى

بينما كان ضوء النهار مازال يتوارى فى عباءة ظلام الليل.. خرج رجل من المسجد يمشى على مهل.. مر على محلٍ تتصاعد منه رائحة الطعمية الساخنة فجرى ريقه.. قال لنفسه أعقل يابرعى.. بلاش تهور كفاية الفول النهاردة..!!
رجل فى الخمسين من عمره.. ممتلئ الجسم.. عيناه ضيقتان.. أشعث الشعر.. يعمل موظفا بإحدى الهيئات منذ خمسة وعشرين عاما.. مر الرجل على عربة تقف فى زاوية الطريق الضيق المؤدى إلى منزله.
اتجه إليها.. صباح الخير يا حاج جابر وحياة أبوك بخمسه جنيه فول.. وبينما جابر يحضر الفول كان برعى يأخذ ثمانية أرغفة من الخبز.. أعاد إليه جنيها من العشرة جنيهات التى ناوله إياها.. أخذه برعى وهو ينظر إليه بحسرة..!!
وما إن دخل من باب شقته حتى بادرته زوجته.. ماتنساش يا أبوحامد تجيب معاك وأنت راجع من الشغل زيت وسكر.. وشاى ودقيق.. أحسن خلصوا.. وهات معاك بطاطس وبدنجان و كام رغيف.. وضع الرجل الفول والخبز على المنضده التى تتوسط الصالة.
جاءت ابنته فايزة.. بابا الجزمة انقطعت.. ومابقتش تنفع تتصلح.. أنا عايزة جزمة جديدة.. وقبل أن يرد خرج حامد متجها للخبز وعلبة الفول.. صباح الخير عليكم.. كويس أنى لحقتك.. عاوز فلوس علشان أجدد اشتراك المترو.. وكمان عايز أشترى كتاب فى المحاسبة.. هز الرجل رأسه وهو يقول بصوت ضعيف.. إن شاء الله.
ذهب لعمله وقضى يوما روتينيا كالمعتاد انحشر فيه بين الموظفين والموظفات والأحاديث المكررة عن الطماطم والخضار واللحمة والانتخابات..!! أنتحى بزميلته فى العمل أم الخير.. أوصاها أن تتصرف له فى جمعيه من اللى بتعملها.. ويقبض الأول.
أنحشر فى المترو فى طريق رجوعه من العمل.. وأمام المحطة وعند مروره بجوار المقهى.. وجد من ينادى عليه.. يا أستاذ برعى يا أستاذ برعى..!!؟ وجده صديقه مرسى الكهربائى.
أزيك ياراجل.. فينك.. أقعد أشرب واحد شاى.. جلسا يتناولان الشاى ومرسى يمسك بالجريدة فى يده.. ماسمعتش يا أستاذ برعى.. مش هيجيبوا موظفين من بنجلاديش..!! رفع برعى حاجبيه متعجبا..!!؟ بنجلاديش أزاى مش فاهم..!!؟
فتح له الجريدة.. أراه تصريحا لأحد الوزراء ينتقد فيها تبتر الناس على الحد الأدنى للأجور.. والخلاصة بيقول .. بوسوا أيديكم وش و ظهر.. إحنا ممكن نجيب عماله من بنجلاديش بأقل من 400 جنيه فى الشهر.
قال لنفسه.. يا خبر أسود..!! مستكترين علينا أن نطالب بأدنى حد من الحياة لنا ولأولادنا ويهددنا يجبولنا عماله من بنجلاديش..!! طيب أشمعنى من بنجلاديش يعنى..!!؟ رد مرسى.. أصل العالم هناك قنوعه.. وبترضى بقليلها.. وبعدين جسمهم سفيف.. ومابيكلوش كتير زينا.. يعنى ال400 جنيه تقضيهم..!!
رجع لمنزله وهو لا يرى أمامه.. أخذ يستعيد كلمات مرسى.. يكاد لا يصدق ما قرأه فى الجريدة..!! دخل شقته.. واتجه إلى السرير مباشرة.. حمد لله على السلامة.. أنت جيت إمتى..!!؟ مش هتتغدى.. قال لها لأ.. هريح شوية.
وجد برعى أحدهم يركب حصانا و يمسك400 جنيه يلوح بها والكرباج فى يده ويقول.. موظف خرسيس.. أدب يوك.. وأحدهم يمسك به لتعليقه فى ذيل الحصان تمهيدا لسحله..!!؟
أخذ يصيح ويرغى ويزبد.. وهو يقول.. دنا واللى زى اللى بندفع لك الراتب والبدلات والمكافآت.. و لقمة الجاتوه والبقلاوة اللى فى أيدك من الضرائب المفروضة علينا من لحم ودم الحى..!!
محدش حاسس بينا.. تقدر تعيش أنت لوحدك حتى بدون الأولاد والمدام ب400 جنيه ولو لا مؤاخذة.. لشهر واحد..!!؟ طيب ده حتى الولاد توتى و كوكى ولا حماده ميقدروش يعيشوا بيهم مصروف..!!؟
طيب إزاى نعيش أنا وأسرتى بالمبلغ ده.!!؟ سكن وأكل وشرب ومواصلات وهدوم وعلاج وتعليم..!!؟
تصدق أنت صعبت عليا بالرغم من زفارة لسانك وقلة أدبك.. أشار لهم بأن يفكوه.. قال له.. شوف يا برعى أنا هكون حنين معاك.. وهثبتلك أن ال400 جنيه دول يكفوا وزيادة.. صاح بصوت جهورى.. اجتماع عاجل..!!
تجمع عباقرة الاقتصاد من الوزارة ومن مكاتب استشارية وحضر أيضا مندوب من صندوق النقد الدولى فى حضور ممثل من الأمم المتحدة واليونسكو واليونسيف والهلال والصليب الأحمر والاونو والفاو وهيومن رايتس ووتش ومنظمة التجارة العالمية وأطباء بلا حدود ومنظمة وقف الجوع الآن وجميع المنظمات المعرفة والغير معروفة حتى مندوب الفيفا دعا للاجتماع..!!
جلسوا مع برعى لوضع ميزانية شهرية له.. لأنه إنسان مسرف ومشكلته ليست فى قلة الراتب ولكن فى جهله فى تدبير حاله بال400 جنيه..!!
وقف رئيس الجلسة ليفتتح فعاليات الاجتماع قائلا أحب فى الأول أقول.. إن ماهية برعى مبلغ عال ومش بطال.. نقدر نجيب بيهم أصناف من التموين.. وعلب سردين.. وقمر الدين.. وجوز ولوز.. وبندق وتين.. ولحمه وخضار وممبار.. وخس وكوسه وحمل خيار.. وبدله وبالطو وكام فستان.. وجزمه كمان.. وجبٌة وشال وكام قفطان.. بس الأول نعرف برعى طريقة صرفهم ..!!!
امتد الاجتماع على غير المتوقع لمدة تزيد عن تسع ساعات وشوهد بعضهم وهم يدخلون ويخرجون وهم يحملون أطشات من المياه الساخنة لقاعة الاجتماع لسبب غير مفهوم.. فسره البعض بأن ولادة القرار متعسرة..!!؟
فجأة خرج مندوب منظمة حقوق الإنسان وهو يضع غطاء حلة فوق رأسه وقد أصيبت عيناه بالحول وهو يرقص ويبكى ويقهقه..!!؟ أرسلوا لسفارة بلده ليحضر أحدهم لاستلامه..!!؟
أما برعى فقد خرج من الاجتماع وهو يصيح.. والملاحة والملاحة.. وحبيبتى ملو الطراحة.. حسره علينا.. ياحسرة علينا..!!؟
وعلى الفور جاء اثنان من العمالقة كانوا فى انتظاره من قبل أن يبدأ الاجتماع..!! ألبسوه القميص أبو كم طويل.. وربطوه خلف ظهره..!!
وعندما قاومهم خرج إليه سعادة الوزير والدموع فى عينيه وطبطب على كتفه قائلا له.. روح يابنى يابرعى معاهم.. هناك فى العباسية فى عنبر 8 هتلاقى هنومه مستنياك.. وهتكتب الكتاب وتعلى الجواب..!!
سمعها برعى فهدأ..!! ساقوه وهو يتطلع للسماء.. كان ينبعث من سماعات القاعة.. بلدنا أمانه فى أدينا.. نعليها مادام عايشين.. نعيش فيها سنين وسنين.. واحنا مطمنين.. ماشربتش من نيلها .. جربت تغنيلها..!!
وعند خروجه كانت الصحافة فى انتظار برعى لتسأله عن نتيجة الاجتماع.. وهل حلت مشكلته..؟؟ تفاجئوا ببرعى على حالته هذه.. يداه خلف ظهره.. ناظرا لأعلى.. وعينيه تبدو بيضاء اختفى السواد منها..!!
تجرأ أحدهم وسأله.. تحب تقول حاجه يابرعى..!! ظهرت على وجهه علامات الانتباه وقال أيوه أحب أقول..!! أنا م البلاددى.. أنا م البلاددى..!!؟؟
أستقر وضع برعى.. أخذ موقعه الدائم فى مستشفى العباسية ولعجبه وجد الكثرين من زملائه ومعارفه هناك..!! أما أولاده وزوجته فقد صرح سيادة الوزير أنهم أمانة فى رقبته..!!
وسيتم صرف المعاش لأسرة برعى كاملا 400 جنيه..!! إن شالله ماحد حوش..!! وعلى الأقل خلصناهم من برعى وأكله وشربه ومصاريفه وقرفه.!! وده طبعا سيعود عليهم بالرفاهية والعيش الرغيد..!!
وهنا علا صوت المحيطين بالسيد الوزير قائلين فى نفس واحد.. ياسلام على الحنية.. يا سلام على الإنسانية..!!؟