طفل بيصرخ وحده يتيم عيشتى مرار بطعم أليم نفسى ألاقى صدر حنان نفسى ألاقى قلب رحيم ** نايم صاحى بجوع موجوع صبح وليل على خدى دموع بعد أبويا وأمى ما ماتوا ضلمة الدنيا ما فيها شموع ** عايز إيد تساعدنى أقوم عريان عايز دفا وهدوم لمَّا سقيع البرد بيجى أبكى يا ريت الحر يدوم ** أغلى الناس ماتوا وسابونى وبقيت من كل أمان محروم أنا محتاج لنظرة عطف من إنسان يشاركنى هموم *** كان الأمل معاى ممتد راح الحلم حقيقى اتهد وكل مابرجع أحلم تانى ألاقى طريق الحلم اتسد ماتوا أغلى حبايبى ياناس وملانى الحزن حقيقى بجد **** تايه جوا الدنيا الزحمة وساعات يصبح بيتنا رصيف محتار أنا مش لاقى نصيحة وساعات يامه أستنى رغيف كنت بروح مدرستى وشاطر واخد البوسة وطالع فاطر بعد الحضن الدافى ما مات قلبى جريح مكسور الخاطر ** ليه الكل سايبنى وناسى حتى اللفظ علينا دا قاسى أيوه يتيم وشىء مش ذنبى كل الدنيا شايفها مآسى ** عصفور ماشى بجرح حزين يبكى ماحد سامع له أنين ماشى بيشكى من الحرمان نفسى ألاقى قلب حنين ** ماشى فى دنيا لوحدى شريد وكل ما بكبر همى يزيد بعد أبويا وأمى ما ماتوا كل الناس قلوبها حديد محتاج رحمة حقيقى يا ناس أنامش عايز حفلة وعيد عايز حد يا ناس يرعانى أبقى زى أصحابى سعيد