كلمتين فى قلبى من زمان.. خلينى أقولهم وأقوم أنام.. مين عارف مش يمكن يكون ده آخر كلام.. أبويا حلف ما يخش بيتنا قرش حرام.. وأمى صبرت وربت الأيتام.. قالوا الحزن بيروح مع الأيام.. لكن راحت أيام وجت أيام.. ولسه الحزن.. خلينى افتش جوايا واحسب اللى فاضل معايا من أيامى الجميلة بقرش صاغ.. وضحكة م القلب أرمى روحى وسط الناس ألاقى فى كل ركن حضن.. يكفينى دفا ميت سنة لقدام.. مين عارف.. مش جايز تكون دى الرحلة الأخيرة ما بين ده أبوك.. وأبوك مات.. مسافة مفيش يا ترى بص ع الدنيا وعرف إنها كدابة ما تسويش.. ولا الراجل مننا بينكسر لما بتموت الأحلام.. مين عارف خلينى أبص تانى ع الطريق اقف عند كلمة ما عرفتش أفسرها.. ماكنش عندى لعب وأنا صغير لكن يوم كبرت بقى عندى لعب كتير كل ما زهقت من لعبة أكسرها.. هربت م الدوشة لاقيت الدوشة جوايا.. أسافر تسافر معايا... وارمى قلبى تانى وسط الناس لكن يتوه منى.. حاجات كتير راحت غصب عنى وحاجات غيرتنى وحاجات ما قدرتش أغيرها.. أنا اللى عشت عمرى كله فى بلاد العاشقين.. أدينى رايح زى ما ابتديت.. حزين قوليلى إن قلبك مسامحنى وراضى عنى ليوم الدين رايح ومفيش معايا زاد لا بيت ولا ولاد مسنود بس على رحمة رب العالمين ومفيش شىء تانى غيرها..
