حاله من الذعر والقلق امتلكت بائعي الأسماك منذ إذاعة خبر نفوق الكثير من الأسماك على ضفاف نهر النيل بمنطقتى فوة بكفر الشيخ والمحمودية بالبحيرة ، قائلين :"إحنا فى الجيزة مالنا بقى إحنا ومال المناطق اللى حصل فيها نفوق الأسماك" وتابعو:" السوق أصابه الركود بعد إذاعة الأخبار دى والناس بقوا خايفين يشتروا سمك من ساعتها .. البائع اللى يفكر بشترى سمك نافق ويبيعه مش عندنا وإحنا ناس غلابه عايزين نعيش بالحلال." وقال عبد الرحمن محمد رئيس سوق السمك بالمنيب :"أنا المسئول عن سوق سمك المنيب من سنين .. وسعر السمك فى متناول الجميع .. احنا فى السوق هنا بنبيع بكل ضمير" وتابع قائلا :"مستحيل سمكه واحده فاسدة أو نافقه تدخل هنا وأنا فى السوق" ، مشيرا ألى أن كل تاجر سمعته أهم من البيع ، قائلا :" لو باع مرة سمك فاسد أو غير صالح أو نافق مش هيعرف يبيع المرة الثانية وساعتها التاجر خسر كل حاجه " وأضاف :" لازم الناس تشترى سمك من تجار معروفه وتركز أكتر إن السمكة تكون بحالة جيدة قبل عملية الشراء. وفى نفس السياق قال تاجر آخر بسوق المنيب :" احنا اتوقف حالنا وحركه البيع قلت أكثر من الأول بسبب مشكلة نفوق الأسماك اللى حصلت فى البحيرة وكفر الشيخ " وتابع :" الوزارة هى اللى مسئولة لازم يشوفوا حل بسرعة إحنا كدا مش عارفين نشتغل " وأضاف:"مفيش نوع من الأسماك دى نزل الأسواق .. ولو الزبون لقى خياشيم السمكة لونها أبيض من جوه ما يشتريهاش ، أو عين السمكه بيضة ما يشتريهاش ، أو يكون للسمك رائحة" وقال الحج سلمان الموجي بائع أسماك بسوق المنيب :" أنا بقالى هنا فى السوق من 2003 وعمر السوق ما باع سمكة واحدة فاسدة ، ومن ساعة إذاعة الخبر وإحنا مش عرفين نبيع.
