طالب بائعو سوق السلام بمدينة مرسى مطروح، الخاص ببيع الدواجن والأسماك، اللواء بدر طنطاوى الغندور محافظ مطروح بنقلهم إلى سوق آخر أو جعل السوق المتواجدين به يشتمل على بائعين للخضروات والفاكهة بجانبهم، بعد أن عزف المشترون عن المجئ إليهم وأصبح السوق مهجورا. وسوق السلام هو أحد الأسواق الحضارية بمدينة مرسى مطروح التى تم نقل الباعة الجائلين إليها منذ حوالى شهر والذين كانوا يتواجدون بوسط المدينة.
وقال أحمد عبد العزيز، تاجر أسماك ، " المسئولين قالوا إن السوق اللى قدام المستشفى هيكون لتجار الجملة وسوق السلام هيكون شامل لجميع البائعين، ولكن اللى حصل إن كل البائعين راحو السوق التانى وبقى السوق ده مهجور ومش لاقيين حد علشان نبيعلوا".
فيما قال على جوده، بائع دواجن، " احنا مش لاقيين زباين علشان نبيعلهم البضاعة بتاعتنا ، وعلينا ديون للتجار ومش لاقيين نأكل بيوتنا، ومن ساعة ما جيت السوق ده أنا خسران أكثر من 10 آلاف جنية ".
وقال محمود فتحى، بائع أسماك، "السمك اللى بنشتريه من التجار بيبوظ من قلة الزباين، هل يعقل أن يتعمل سوق للسمك والفراخ وبعدها الناس تروح سوق تانى بعيد عنه علشان تشترى الخضار والفاكهة، ماهو لازم الناس متجيش هنا وتروح تشترى حاجتها كلها من الأسواق التانية مره واحده ".
وقال حميده على ، موظف ، " أنا علشان أجى السوق بضطر أستخدم مواصلتين وده بيسبب عبء مالى وجسدى علينا ، وسوق السلام على طريق سريع ونحن نخشى على أرواحنا وأولادنا من المجئ هنا ، ثم نعود مرة أخرى لوسط البلد لنستكمل باقى المشتريات ".
وقالت سارة على، ربة منزل، " الموضوع ده تعب علينا ، ولما كنا فى السوق القديم كنا بنشترى حاجتنا كلها مره واحدة ، لكن كده مينفعش ان احنا نفضل نتنقل ما بين كذا سوق علشان نكمل مشرياتنا ".
وقال محمد عبد الله ، مُحصل السوق، " أنا كنت متواجد من قبل بداية عمل السوق بشهر ونصف ، وقمنا بعمل مذكرات بإحتياجات السوق وطالبنا رئيس مجلس المدينة بتعلية سور السوق، وكذلك استكمال باقى خدمات الأمن والسلامة بالسوق ، وكلما طالبنا مسئول بهذه الخدمات يقول " احنا جبناهم من الشارع " ولا يتم حل هذه المشاكل.
وأضاف بأن هذا السوق بعيد عن المواطنين، ولا يوجد به سوى 10 محلات مفتوحة وباقى المحلات لا نعرف أصحابها ولم نراهم من قبل ، وتم تخصيص هذا السوق، الذى تكلف أكثر من 5 ملايين جنية، لبيع الأسماك والدواجن فقط دون باقى المنتجات وبالتالى أصبح شبه مهجور.
ومن جانبه قرر محافظ مطروح اللواء بدر طنطاوى الغندور، إتخاذ كافة الإجراءات القانونية حيال أصحاب المحلات المغلقة بسوق السلام، على أن تعطى لمن يستحق شريطة أن يكون النشاط بيع خضروات وفاكهة وما يحتاجه السوق.
وأضاف الغندور بأنه سيتابع الأمر وسيقوم بالمرور على السوق ليرى ما تم تنفيذه على أرض الواقع ، مؤكدا بأن سوق السلام سيكون من أكثر الأسواق جذبا للمواطنين بسبب أسعار السلع والتى ستكون منخفضه عن باقى الأسواق بالمدينة.
