فى الفترة الأخيرة لقينا اتحاد ظريف ولطيف بين فصيل مدعى الثورية اللى ميعرفش حاجة غير الشعارات والتويتر وفصيل الإخوان والمتأسلمين.. الاتنين طلعوا بهشتاج "مش أحسن ما نبقى سورياوالعراق".. البهوات طبعًا بيتريقوا بعد لما فشلوا فى حشد الشارع ضد النظام فى أزمة الكهرباء.. وحقيقى شىء محزن ويجيب المرارة أننا نشوف ناس بقيت مغيبة تمامًا عن الواقع.. الحقيقة قدامهم ومش عايزين يشوفوها ناس مش قادرة تصدق أن معركتنا هى معركة وجود معركة بقاء معركة إرهاب لو انتصر فيها الطرف الأخر لن يكون هناك مصر ولكن كل ده مش مهم المهم بالنسبة لهم أننا ننزل وننادى بإسقاط النظام عشان أزمة الكهرباء، طب نقول ايه! نفهمهم إزاى أن أزمة الكهرباء موروثة ومش هتتحل بين يوم وليلة؟ نفهمكم إزاى أن مصر فى خطر حقيقى.. نفكرهم باللى حصل فى مصر يوم 14 و15 أغسطس؟ ولا نقولهم مش أحسن ما نكون سورياوالعراق لا أقولكم خلينا نقول مش أحسن لما نكون سورياوالعراق ولبنان والخليج واليمين وليبيا والسودان والوطن العربى كاملاً باستثناء كام دولة. أنا مش ببالغ.. بص بعينك على الوطن العربى كله إللى معظم بلاده بقيت يا إما اتقسمت أو انهارت أو فيها حرب أهلية أو على وشك الانقسام إلا مصر الوحيدة إلى يا دوب فلتت، سوريا حرب أهلية وأصبحت بؤرة للإرهاب ومقسمة حاليًا لثلاثة أجزاء بين جبهة النصرة وداعش وبشار. العراق لا يوجد دولة! ولبنان صراع دائم بين ثلاث طوائف ده غير داعش اللى تقريبًا على الحدود وممكن تقتحم فى أي لحظة، الأردن حالة رعب وفوضى وداعش على الحدود وفى استنفار أمنى كبير بجانب تأثرهم بالحرب السورية ونزوح عدد كبير من اللاجئين السوريين. السودان أتقسمت بالفعل.. مبروك! ودول الخليج كلها مهددة بسبب داعش التى تقف على بعد أمتار من حدود بعض الدول كالكويت مثلا وطبعًا من المعروف أن كل هذه الدول لو حدث فيها 5٪ مما حدث فى مصر ستسقط بلا عودة.. اليمن الحوثيين يسيطرون فى الشمال ومعارك فى مختلف أرجاء البلد الشىء المؤكد أن اليمن على بعد خطوات من التقسيم لست مناطق. ليبيا.. لا توجد دولة من الأساس! حتى قطر ضريبة الأمان اللى هى عايشه فيه هو أكبر القواعد العسكرية الأمريكية فى المنطقة الموجودة على أراضيها يعنى محتلة! ايه حالة الإنكار واللا مبالاة، إيه حالة العمى والانفصال عن الواقع اللى توصل أننا نسخر ونستهزئ بخطر دمر بلدان كاملة حولنا ولا يزال يهددنا خطر أوروبا وأمريكا اللى فى آخر الدنيا عاملين حسابه ويخططوا للتدخل العسكرى للقضاء عليه ما بالك بمصر اللى على بعض خطوات منه! الوضع اللى إحنا فيه دلوقتى بكل قرفه هو جنة مقارنة بالوضع فى أي بلد عربى وأيضًا الجنة ونعيمها مقارنة بالوضع لو كان الأخوان استمروا.. المفروض أنى كواحد بحب وطنى أنزل وأثور وأنادى بإسقاط النظام عشان اثبتلك أنى عاقل وثورى ومتدين يا أخى كتكم القرف فعلاً عديمى العقل والوطنية.. لو لم أقف مساندًا وطنى اليوم فتلك هى الخيانة بعينها.. وعمومًا مصر لن تكون أبدًا مثل سوريا ولا العراق ولا غيرها لأن لها رب يحميها وشعب أصيل واعٍ يفهم ما يحدث حوله وبإذن الله سيستمر فى نضاله ودعمه لوطنه حتى نخرج من أزمتنا رغم أنف كل الحاقدين والمتأسلمين.
