ناس تشوفها فى الحياة تقول بنى أدمين غلابة وربك والحق عالم بالقلوب دول مكانهم وحوش فى غابة تيجى تعاتبه يقولك مصاعب والعيب ماهو فينا ده الزمن اللى عايب يشتكيلك من ألف حاجة وكيت وكيت من الفقر والعيال وطلبات البيت عمره ما يغلط ضميره ولا يفتكر ربه اللى مغرَقة بخيره ياخى اختشى على نفسك وخللى عندك دم ليك عين تحاسب ربنا على قسمته جَك هم وناسى فوق كتافك كوم ذنوب وهم ما يتلم دى ما بقتش صفحة سودة.. ده بقت مجلد أنت فاكر يابو الذكاوه إنك فيها مخلد يوم ما تقف قدام اللى خلقك هتقوله إيه؟ بذمتك فكرت يوم فى وقفتك قدام سيدك وهوه بيحاسبك وانتا يا ولداه ما فى شىء بأيدك إراهنك لو فكرت ثانية مكنش ده هيبأ حالك كنت عملت حساب ليوم هتبيعك فيه عيالك و تعدى عالصراط يا تفوت يا هالك صحصح يا صاحبى قبل ما يفوت الأوان طول ما لسه النفس طالع انتا لسه فى الميدان الحق تتوب لربك ولسه مفتوح الكتاب لا ييجى الأجل على غفلة وتلاقى قدامك ملايكة عذاب وساعتها أدام عنيك هتشوف الحقيقة المرة "الدنيا" اللى بعت عشانها ضميرك متسواش كده ذرة يا رب يا رحيم احسِن أخره كل واحد واللى معمى على قلبه الهمة يوحد الواحد واجعلى معاهم يا رب نور جوه قلبى وبحق حبيبك محمد.. خلينى "ممن رحم ربى"...
