الخامسة عصراً ياااااه النهارده صاحى من النوم بدرى عن كل يوم.. شكلها بقت الساعة 4 العصر.. يالا فاتنى صلاة الضهر.. المهم هلحق العصر النهارده.. بس كمان شوية لسه ساعتين ع العشا.. قصدى المغرب. الواحد دماغه خرمانة.. يمكن من الصيام؟؟ الخامسة والنصف الواحد ريقه ناشف.. أما أدخل اغتت ع الست أمى فى المطبخ.. إيه يا حاجّة الروايح اللى تفتح النفس دى؟؟؟ ملووووخية.. يا ولددد، بس طبعا مالحقتيش تعملى الحلو، النهارده وإمبارح وأوله.. 3 أيام يا ست يا مفترية مفيش حتة كنافة ولا قطايف.. أساعدك نعمل كنافة؟؟! أساعدك إيه.. يا حاجة أنا قادر أصلب طولى.. أنا عندى مذاكرة، إنتو هتستهبلوا فيها واللا إيه؟؟؟ ده أنا يجوز لى الفطار، عندى عذر، مش بذاكر يا بنى آدميين.. إيه أذاكر وأصوم وأساعدك كمان؟؟! لييييييه؟؟؟ السادسة إلا خمس دقائق هنزل أجيب سجاير عشان بعد الفطار ما ضيعشى وقت.. إيه أجيبلك لفة قمر الدين من إبراهيم البقال؟؟؟.. ليه أنا الشغالة بتاعتكم؟؟ طب مش نازل.. نهار أبيض آدى المغرب أذن والعصر ضاع ع الواحد وكله م الرغى بتاعكم.. ياللا بعد الفطار أبقى أصليهم مع المغرب.. ولو أن الملوخية هتكبس على مراوحى أنا عارف اللى فيها.. السادسة والنصف حد يعمل ملوخية وصابح صيام وعطش وحر.. أنا محدش بيعمل لى حساب فى البيت ده خالص؟؟؟؟ أنا حاسس أنى هفأ.. حد يقلب القناة، أيوه هاتوا otv ، تامر وشوقية هتبدأ.. لأ لسه فاصل.. اقلبوا كرومبو على موجة، أقلب ياض يا محمود، آمال أبويا وأمى خلفوك على كبر ليه ياض؟؟؟ اعمل حاجة ياض.. أما أقوم أحسن جالى إسهال من الملوخية.. السابعة مساءً آآآآه الواحد كده ارتاح.. حد يولع ع الميّة عشان الشاى، اتحركى يا بت يا مرفت، أمال الواحد له أخت ليه..؟؟ واللا بقولكو إيه هغور من وشكوا واشرب الشاى ع القهوة.. ياللا سلام.. الواحدة بعد منتصف الليل يا نهار أبيض يا واد يا محسن تلات ساعات يا ابن اللعيبة بتلاعبنى طاولة أما ريقى نشف وسففتنى 7 شاى.. أما أطلع أفتح لى كتاب واللا أصلى لى ركعتين، من الصبح ما ركعتهاش.. الثانية والنصف صباحاً اوعى وشك.. إيه يا بت يا مرفت المُزّة اللى فى التليفزيون دي.. إيه؟؟؟؟ كلام نسوان؟!، إيه النظام الجديد ده.. دى السهرة هتحلو.. يا خساااارة يا بت يا مرفت يا فقرية النور قطع.. الواحد يشرب له سيجارة فى الشباك.. الثالثة صباحا ده الفجر قرّب يدّن يا ولاد الأيه يا بتوع الكهربا.. إيش حال ما كنشى عندنا مذاكرة.. الثالثة والثلث صباحاً قشطة النور جه، إيه ده عمرو خالد، لأ نبقى نشوفه فى الإعادة الصبح.. حد يقلب أى حاجة، بيت العيلة ده إيه كمان؟؟.. أى حاجه.. اقلبى يا بت القرف ده، ايوووه هاتى العياده كت حلوه النهارده، نشوفها تانى ورانا إيه...هاه هاه هااااااه. الثالثة والنصف صباحاً صحى أمك يا بت وحضروا السحور.. إيه ده فوول؟؟؟ بطننا ورمت م الفول، كويس فيه بيض مقلّب؟؟؟ سيبى البيضة يا بت يا مرفت.. هتخلص الفول يا محمود، هو أنت صايم ياض.. سيب الفول.. الرابعة وربع صباحاً سامعين يا عيال، أهو الفجر أذّّّّن أهوه.. صوت الحاج أحمد.. مستعجل أوى يا حاج أحمد.. الواحد ما لحقشى يحبس حته بكباية شاى.. طب كنت استنى 3 دقايق نصلى ركعتين واللا حتى صلاة العِشا.. ياللا أهو بُكره اليوم طويل.. الواحد حيله أتهد.. طفوا النور واتخمدوا يا عيال..
