عبير السيد - مدرسة والله التأجيل حيكون أفضل الحلول، لأن اللى إحنا بنشوفه فى المدارس قبل موضوع أنفلونزا الخنازير ميطمنش بالمرة، يعنى النهاردة لما يبقى عندك مدارس، عدد التلاميذ فى الفصل الواحد فيها أكتر من 80 تلميذا، أكيد حيبقى أنا عندى مشكلة مع الكحة العادية، طيب الوضع حيكون إيه مع أنفلونزا الخنازير. شريف إسماعيل - مدير مبيعات أنا شايف أن مافيش داعى لتأجيل الدراسة لان أكيد حيبقى فيه حلول تقدر تخلينا نتعامل مع الفيروس وعلى حد علمى أن الفيروس مش قاتل بالدرجة المرعبة، وفيه حالات كتيرة تم التعامل معها بنجاح فى المستشفيات، ولكن المشكلة لازم يعرفوا الناس تتعامل إزاى مع الأزمة فى المدارس. د. عادل موريس - مدير بشركة أدوية بصراحة الوضع خطير جداً والاهتمام الحكومى حتى الآن لا يرقى لأهمية الموضوع، خلاص المدارس على الأبواب ومحدش فى البلد عرف إيه الإجراءات اللى وزارة الصحة عملتها أو الناس المفروض تعمل إيه فى الأيام الجاية بالنسبة للمدارس وبالنسبة لأولياء الأمور وبالنسبة للظروف الصحية. حسين طه - سائق تاكسى موافق على تأجيل الدراسة وياريت الرئيس يأمر بكده، لأن فى موسم المدارس نسبة المصابين بالأنفلونزا هتزيد، وبعدين النهاردة لما الطالب يرجع من المدرسة أكيد اللى فى البيت هيخدوا العدوى، والحكومة مش هتعرف تعمل حاجة وأنا بقول كده لان نفس الكلام اللى بتقوله الحكومة دلوقتى عن المواجهة والخطط، سبق وقالته عن أنفلونزا الطيور اللى من ساعة ما دخلت مصر مطلعتش تانى.
