ما تصدقش كل اللى يتقال ولا اللى بيلعب ع الحبال بيمسك العصاية م النص ويقولك تعالى وبص دا أنا كاتب فى حبك موال ما تصدقش اللى يقول باحبك ويروح من وراك ويسبك وسيرتك دايماً على لسانه بالطيب والردى بيلحن ألحانه ويحلف أيمانات بربه وربك ما تصدقش اللى يعاملك باللين بس ناوى يودّك إلى حين ما يقضى معاك مصلحته وينول غرضه ومكرمته ويرجع يتلوّى زى التعابين ما تصدقش اللى يضحك فى وشك ويعمل حريص أوى على عشك لسانه زى العسل وكلامه لقلبك وصل وفى أول خلاف يقلب عليك ويغشك ما تصدقش غير عقلك وإحساسك واعرف مين هما ناسك ومين بيحب الحب الخالص وموش عاوز حاجه خالص غير حبك بس وإخلاصك