مش أنت لوحدك يا ريس.. اللى معاك شرعية أنا كمان معايا شرعية ومسجلها فى بطاقتى الشخصية آه والله معايا ومسجلها فى خانة الجنسية مش الشرعية هى صوتى.. يبقى كل مصرى له شرعية يعنى أنت بقيت ريس لما أنا أديتك الشرعية بس أنا ادتهالك أمانة.. مش هدية يعنى لما أقولك رجعهالى ما تطمعش فيها وتقول خلاص دى بقت بتاعتى وظبط نفسى عليها لأن دى تبقى خيانة أمانة وربنا ما يرضاش بيها عارف يا ريس الشرعية دى تشبه إيه؟؟ الشرعية دى حاجة تشبه للشرف.. وعلشان هى غالية علينا.. بنديها لشخص قوى وأمين علشان نكون مطمنين عليها ونام مرتاحين بس بنشترط عليه يشلها فى مكان مكشوف علشان نقدر نشوفها وعنينا تفضل دايماً عليها ولو فى مرة حسينا بالقلق عليها على طول هانقولك هاتها يا ريس وإحنا بنفسنا هانحميها ولغاية ما نلاقى اللى يقدر عليها.. إحنا بأرواحنا هانفديها وأوعى تطمع فيها يا ريس أو تزعل عليها وافتكر إنك كنت مجرد حارس عليها يعنى لا إحنا بعناها.. ولا أنت كنت شاريها