متيجي اسالك سؤال وتسالني سؤال , طيب مفيش اجابة؟ خلي حد غيرنا يجاوب ,,, من تلاتين سنة ,, وانا وانت بنسال اسالة ومتعودين اننا منجاوبش , بس المدهش اننا كمان عمرنا مسالنا نفسنا هو ليه مفيش اجابات علي الاسئلة دي ؟ ! حاضر يا سيدي تعالي نفتكر الاسئلة دي وانت تسالني وانا اسالك بس المره دي عاوزين المسئولين عن البلدهم اللي يجاوبوا ,, فاكر السؤال ده : هو يعني ايه مليونير ؟ وايه الشغلانه اللي تخلي صاحبها مليونير ؟ طيب خد السؤال ده : هي الحكومة بتدفع ضرايب وبتدفع كهربا وتليفونات ؟ ولا السؤال ده : هو الريس مبارك مرتبه كام ؟ ويا تري بيكفيه ؟ ولا عيال الريس يا تري بيدرسو فين ؟ ولا بيشتغلو ايه؟ هي مرات الريس بتعرف تطبخ ؟ ويا تري بتزعقلو وبتتخاصم معاه وتسبلو البيت ؟ هو في مصر ممكن وزير يقول قرار من نفسه من غير ما الريس يامره ؟ طيب هو ممكن حد يقول للريس مينفعش ؟ هو ليه الريس دايما بينجح في الانتخابات بتعته بتسعه وتسعين وتسعه من عشره في المية ؟ وكمان في سؤال كان هيجنني : يعني ايه برلمان ؟ ويعني ايه نائب في البرلمان ؟ وليه الناس بتدفع كل الفلوس دي علشان تخش البرلمان ده ؟ ولا الموظفين : هو الموظف اللي عنده ستين سنه وقاعد علي مكتب صفيح تفتكر يكون بيعمل ايه في الشغل ؟ ولا الاتوبيس هو ليه بيبقي زحمه كده ؟ وليه الناس دايما بتجري وراه ؟ انا بقي اللي عندي سؤال هيجنني : الحديد اللي معمول في الطريق والعربيات بتتكسر منه هو ايه الغرض منه ؟ طيب خد عندك السؤال ده : هو ليه كانت امن الدولة اي حادثة تاخد الناس اللي بتصلي ؟ كمان حاجه مهمة اوي : مين اللي الف نشيد يحيي الهلال ويا الصليب ؟ وليه ؟ تفتكرده اللي عمل الفتنة اللي بيقوله عليها ؟ تفتكر هنفضل كده كتير من غير شغل ؟ ولا الاسعار هو مين اللي بيحط الاسعار دي ؟ طيب تفتكر مين اللي اخترع كلمة كوسة ؟ واشمعني كوسة ؟ طيب ليه كل الشباب عاوزين يبقو ظباط شرطة ؟ طيب وليه محدش عاوزيخش الجيش ؟ وكمان ليه كل الناس عاوزه تسافر بره ؟ هي ايه حكاية انت مش عارف بتكلم مين ؟ ولا كلمة ده ابن ناس ؟ هو احنا ليه مبنقدرش نقول لا ؟ تفتكر كلمة لا زي مبيقولو اللي بيسموه انقلاب ؟ هو انقلاب ولا تمرد ؟ تقصد خيانة ؟ تفتكر هيجي اليوم اللي نقول لا حتي لو همه سموه خيانة ؟ طيب كلمة لا هتكون علشان ايه ؟ ممكن اسال يعني ايه حرية ؟ تفتكر حد هيجوبك ؟ تفتكر هيجي يوم نبقي زي بلاد بره ؟ وهي بلاد بره فيها ايه علشان نبقي زيها ؟ هو ممكن يجي يوم ونبقي اللي بيقولو عليه بني ادم ؟ بني ادم ؟ صحيح هو ليه الريس كل خطبه يقول ايها المواطنون ؟ ياسيدي ماشي :ممكن يجي يوم نبقي ايها المواطنون دي ؟ طيب حد يقولي يعني ايه ثورة ؟ واحنا ممكن نعمل ثورة ؟ هم ممكن يسيبونا نعمل ثورة ؟ هي الشرطة ممكن تضربنا لو عملنا ثورة ؟ انا اللي عاوز اسال الجيش هتقف جمبنا لو عملنا ثورة ؟ طيب الثورة دي هتكون علشان الجوع ولا الفقر ولا الجهل ولا الظلم ولا الحرية ولا ايه بالظبط ؟ هو الاول مين اللي عامل فينا كل ده ؟ تفتكر الحكومة ولا الريس ولا مراته ولا عياله ولا مين بالظبط ؟ انا تعبت من كتر الاسئلة ,,, وانا محتاج حد يجاوبنا ,,, بس اللي انا اعرفه ان لكل بداية نهاية ,,, وانا كمان اللي اعرفه ان لكل نهاية بداية . وللاجابة نحن منتظرون ,,,
