بعد إلحاحه عليك وإصراره أنك لازم تروح معاه ويحلف عليك بالطلاق إنك لازم تفطر معاه النهارده. ترضخ وتقول لنفسك وماله أهو تغيير جو. ويمكن صاحبك يطلع دمه خفيف في البيت والواحد يقضى يوم جميل معاهم. ودخلت بيت صاحبك لاقيته يبلغ المدام إن معه ضيف. ويقول لها واللي عندك الراجل مش غريب يعنى مش ضيف وهو جاي فاضى ومفيش ولا فكهانى قابلنا حتى عم محمد قافل والواد سكره واخد إجازة. تلاقى نفسك في موقف محرج جدا تحاول إنك تقول لصاحبك يا راجل عيب عليك الهزار الرخم ده. تلاقيه يرد عليك ده مش هزار أنا قلت نفطر سوى مع بعض بس المفروض إنك تخزي عين الشيطان وتدخل معاك كيلو مانجو. مشمش.عنب.تفاح. يعنى تخلينى قدام المدام والعيال مرفوع الرأس لكن للأسف انت احرجتنى جدا في البيت. تلاقى نفسك من غير ما تفكر طيب تعالى ننزل نجيب فاكهة عشان شكلك يبقى حلو ورأسك مرفوعه. يضحك ويقولك يا راجل عيب عليك إيه الكلام الفارغ ده هو انت غريب لا يا راجل انت من أهل البيت عيب عليك. ترد عليه طيب عشان العيال يقولوا عمو جاب لينا تفاح أو مشمش أو أي حاجة. تلاقيه يترعش ويحلف بالطلاق ما تتحرك من البيت إن شاء الله العيال ما طفحوا وإيه يعنى تفاح وبعدين ده كله كلام فارغ انت أهم من كل الفواكهة. فجأة تهل عليكم المدام. تلاقى صاحبك يضحك شوفتى يا ستى صاحبى وحبيبى عايز ينزل يجيب فاكهة قال ايه عشان العيال شوفتى بذمتك مش كلامه يحرق الدم. وتلاقى رد المدام لا طبعا عيب. لكن لو كان" مُصر" قوى بدل ما يتعب نفسه يعطى فلوس للواد وهو اللى يجيب. عيب هو ينزل والواد موجود. تلاقى صاحبك يضرب رجله في الأرض وهات يا ضحك وبصوته العالى اهى يا سيدى المدام حلت الموضوع. وينادى على ابنه ويطلب منه الحضور بسرعه عشان عمو عايزك بسرعه ويكمل صاحبك والله الحل ده ما فكرت فيه أبدا سبحان الله. تلاقى نفسك مخنوق قوى من "التدبيسه "السودة دى تحاول تخلع من الفطار لكن مفيش فايدة "مدبس" يعنى "مدبس". ويجى الواد ويقولك بمنتهى البساطة انت معاك كام. ومن الآخر كده طلع 300 جنيه عشان نجيب فاكهة محترمه انجز. تلاقى نفسك تصرخ 300 جنيه فواكه ليه يا عم هو أنا هفطر ايه؟ وتلاقى نفسك مخنوق وتجيلك كرشة نفس وخنقة في "الحوض"" والكبد" والطحال" وتصرخ صرخة يسمعها اللى في سيناء الشمالية والجنوبية وتقول مخنووووووقققققققققققققققققققق !
