كنباوية تقوم بعمل صينية كنافة لكنباوي فهي تعلم مدي حبه لها وكنباوي يقف خلفها يتابعها ويبتسم كنباوية: إيه الابتسامة دي ؟ كنباوي: أبدا مبسوط إنك افتكرتيني وعملتيلي الكنافة اللي أنا بحبها كنباوية: أنا عمري مانسيتك لحظه بس القضية قضية مزاج رايق كنباوي: أفهم من كده أن مزاجك النهارده رايق ؟ كنباوية: جدا جدا ياكنباوي كنباوي: ربنا يروق مزاجك كمان وكمان ويارب دايما بس إيه سبب الروقان ده ماتعرفيني كنباوية: السيسي كنباوي: ماله البطل ؟ كنباوية: مالهوش بس أنا سرحت فيه شويه وفي أفعاله وقلبي انشرح أول مرة أحس أن فيه رئيس للبلد دي بجد كنباوي: ده مش إحساسك لوحدك ده إحساس كل المصريين، المصريين كلهم حاسين أن رئيسهم مش عدلي منصور حاسين أن رئيسهم عبد الفتاح السيسي وبيني وبينك مصر محتاجة لرئيس قوي حازم حكيم شجاع واعي سياسي مش بيخاف بيبدي مصلحة البلد على أي اعتبارات أخرى ياريته يقلع اللسباليت وينزل يرشح نفسه في الانتخابات الرئاسية اللي جاية محتاجة له كتير أوي وهو لازم يعرف ده كويس كنباوية: هو عارف ده كويس بس يخاف يعمل كده يقولوا أنه عمل كده وزاح مرسي علشان كان طمعان في الكرسي والرئاسة والحكم كنباوي: ماهي الناس ماوراهاش غير الكلام وكده كده بتتكلم ومابيعجبهاش العجب ولا الصيام في رجب ومفيش حاجة بترضيها أبدا كنباوية:بص ياكنباوي أنا نفسي ومني عيني السيسي يبقي رئيسنا ومش أنا بس ناس كتير أوي زي حالاتي وحالاتك بس المشكلة في العيال السيس والنخبة اللي حتقول يسقط حكم العسكر الأغبيا ما إحنا طول عمرنا حاكمنا العسكر من محمد نجيب لناصر للسادات لمبارك ولو عمر سليمان كان دخل الانتخابات كان برضه حيبقي عسكر وشفيق لو كان كسب برضه كان حيبقي عسكر مالهم العسكر على الأقل بيعرفوا يحكموها إنت عارف إيه اللي يقول ويحتم أن السيسي لازم يبقي هو الرئيس ؟ كنباوي: إيه ياكنباوية ؟ كنباويه: السيسي بقي أقوي راجل في البلد وأي رئيس حيجي حيبقي مدرك ده كويس أوي وحيبقي خايف أن السيسي يعملها معاه في أي وقت ويشيله زي ما شال مرسي من قبله وده حيعمل حالة من القلق لأي رئيس حتي لو كان منتخب وحيحاول يطيح بالسيسي علشان يضمن وجوده وكرسيه وده مش حيقبله الشعب ولا الجيش وغير كده أي رئيس حيبقي عارف إن أي قرار حياخده لازم يبقي السيسي موافق عليه يعني أي رئيس حيجي حيبقي منظر ديكور والرئيس الفعلي حيبقي هو السيسي مانجيب بقي من الآخر وننتخب السيسي رئيس ونحلها بس هو يخرج من الجيش وينزل الانتخابات وحيكسبها باكتساح مالهوش نظير مصر كلها بتحبه وهو اتعلم من أخطاء اللي سبقوه كتير أوي وبقي فعلا مؤهل للرئاسة كنباوي: كلامك عين العقل بس مين يعمل بيه ياكنباوية ؟ كنباوية: العقل والمنطق والمصلحة العامة هي اللي بتحتم علينا كده والراجل يستاهل وأكبر هدية ورد للدين اللي في رقبتنا ليه من أنه خلصنا من الإخوان الأندال إننا نسلمه البلد يحكمها وهو حيعرف يحكمها صح ويدورها مع رئيس وزراء مخضرم محترم ووزارة قوية كلها كفاءات كنباوي: خلاص نعمل حركة نسميها اختار رئيسك ونطالب بانتخاب السيسي رئيس كنباوية: ياريت ياكنباوي ده يحصل بس مين اللي حيمول الحملة دي ؟ كنباوي: الشعب هو اللي يمولها علشان مستقبله ورئيسه كنباوية: ياريت ياكنباوي كنباوي: نخلص الأول من قرف رابعة واعتصام رابعة والنهضة وبعد العيد نبتدي نخطط للمخطط ده وكل سنة وانتي طيبة وعيد علينا سعيد ماتجيبي حته كنافة كنباوية: ياراجل إنت صايم كنباوي، ياكنباوية: المدفع ضرب وإحنا بنتكلم والكلام أخدك وماسمعتيش الآدان كنباوية: إنت بتتكلم جد ؟ كنباوي: هي دي فيها هزار الآدان إدن كنباوية: طيب اجري صحي الولاد وأنا بسرعة ححط الأكل كنباوي: حاضر بس إنتي شهلي كنباوية: دقيقتين والأكل يكون جاهز على السفرة!
