كنباويه تجلس ولا هي على حامي ولا على بارد الغيظ يأكلها وتريد أن تنفس عن غضبها في أي شئ يلحظها كنباوي فيسألها عما بها وعن سبب ضيقها كنباوي: مالك ياكنباويه ؟ كنباويه: أبدا مفيش مضايقه شويه كنباوي ؟ من إيه ؟ وليه كفي الله الشر كنباويه: كل منقول حنتقدم خطوه لقدام ألاقينا لسه ياكنباوي بنرجع لورا كنباوي: أنا مش فاهمك وضحي انتي عايزه تقوليلي إيه من فضلك كنباويه: الحكومة الجديدة ياسيدي بتتدلع الببلاوي بيراضي كل الناس على حساب حاجات كتيرة مش عاوز يعمل مشاكل مع حد كنباوي: قصدك على مين ؟ كنباويه: قصدي على حزب النور وحركة تمرد كل مايختار حد لوزارة ويبعت له ويتفق معاه والحد دة يقبل بعد كدة يسرب أخبار عن الاختيار ويستني ردود الأفعال ولو لقي حد معترض والاعتراض قوي يبعت للحد ده ويقول له قول للناس إنك اعتذرت علشان مصلحه البلد كنباوي: والكلام ده حصل مع ناس كتير كنباوي: زي مين يعني ياكنباويه ؟ كنباويه: زي إيناس عبد الدايم كنباوي: مين إيناس عبد الدايم دي ؟ كنباويه: دي كانت ماسكة الأوبرا وست محترمة وفنانة راقية عازفة فلوت وزير الثقافة الإخواني اللي فات طردها من دار الأوبرا وفضلت معتصمة مع المثقفين قبل ثورة 30 يونيو بعتوا لها وقبلت الوزارة وقالت إنها رايحة تحلف اليمين وقبل حلف اليمين أجبروها إنها تقول إنها اعتذرت وحطوا مكانها واحد اسمه محمد صابر عرب كنباوي: هو عرب ده مش كويس ؟. كنباويه: مش قضية كويس ولا وحش، القضية أكبر من كده القضية أن اعتراضات حزب النور وحركة تمرد على اختيار الوزراء بتلقي قبول من الببلاوي وده في حد ذاته غلط احنا مش حنعيش عمرنا كله تحت رحمة حد نخلص من الإخوان ومرسي يطلعلنا حزب النور وحركة تمرد احنا مش تحت رحمة حد وما اديناش توكيل رسمي لتمرد بالحديث عننا احنا اديناها توكيل بس في رفضنا لمرسي مش حيتحكموا بقي فينا همه لازم يفهموا ده كويس أوي والببلاوي لازم يفهم أن أسلوب المدادية والطبطبة مش حل ولازم يكون قراره صائب وواحد وحازم وجازم وبدون تردد ويعمل الصح ومايلتفتش لأي حد ولا لاعتراض أي حد ماهو مفيش حاجة بيرضي عنها الناس كلها كل حاجة لازم يطلع لها معارضون من تحت الأرض لسبب أو لغيره اللي بيعمله الببلاوي ده أكبر غلط وعيب في حقنا احنا كمصريين وعيب كمان في حق ثوره 30 يونيو كنباوي: بقي ده هو اللي مزعلك ؟ كنباويه: هو ده شويه ياكنباوي ؟ كنباوي: ياستي دي وزارة مؤقتة ودول وزراء مؤقتين زي كده منصور عدلي ولا عدلي منصور رئيس الجمهورية المؤقت والإعلان الدستوري المؤقت يظهر أن كل حاجه في مصر بقت مؤقته المفروض يسموا مصر دلوقتي جمهورية مصر المؤقتة كنباويه: والله عندك حق وليك حق تتريق على حال البلد الناس مش عايزة تفهم أن ساعات خير الحلول ما بيبقاش الوسط وبيبقي خير الحلول يا أبيض يا اسود يا يمين يا شمال بس الناس مش مدركة كده كنباوي: بكره الغلط يفهمهم كل حاجة كنباويه: ياريت المصريين بيفهموا من الغلط وما يكررهوش تاني كنباوي: بكره ربنا يهديهم ويفهموا ومايكرروش الغلط قومي بقي شوفي حتطبخيلنا ايه النهارده وحتأكلينا إيه على الفطار ؟ كنباويه: النهارده حعمل لكم وزة وصنية رقاق باللحمة المفرومة وكمان صينية بطاطس كنباوي: لا إذا كان كده يبقي الفطار عال العال كنباويه: يلا إن شا لله ماحد حوش كنباوي: ياستي أنا تحت أمرك لو محتاجة فلوس تاني قولي والجيب سداد كنباويه: ربنا يخليك لينا اللي معاية لسة بخيره وماخلصش خيرك موجود كنباوي: ده خيركم انتم ورزقكم انتم ياكنباويه وكله في الأول وفبي الاخر ليكم كنباويه: ربنا مايحرمنا من حنيتك علينا ياكنباوي كنباوي: ولا يحرمنا منك ياغاليه !
