أنا حاسس إن أمخُخى سوف يخرج من أدمُغى ويرحل دون عوده.. آه والنبى أنا دماغى هتدشدش من اللى بشوفه على ذلك فيس بوك.. الكل بيهرى في المهرى وأنا ياخويا بتفرج على مهلى وطالع ميتين أهلي.. الناس اللى على الفيس بيفهموا في كل حاجة.. في السياسة والفن والكورة وكمان في الدين.. آه والنبى فاهمين حتى لو مش فاهمين.. أهو كل واحد بيشوف "بوست" مش فاهمه بياخده كوبى ويشيره على إنه خبير إستراتيجي وخصوصا البنات والستات. آه يا دهوتى يانى يابا.. أعوذ بالله من هذا الذي أراه.. أين أنتِ يا حقوق الملكية الفكرية من هذه المهلبية.. دا الست من دول يادوب تخلص طبيخ للعيال وتجرى عالفيس علشان تبدى رأيها في كل حاجه.. قال إيه ياسيدى بقا لها معجبين بيستنوها من التنابلة اللى حاطين إيديهم على اللايك عمال على بطال. والنبى ياخويا أنا بيصعب عليا الراجل اللى بيكتب بوست هو عصارة أفكاره ونتيجة ثقافاته ومحدش يعبره بلايك يوحد ربنا.. قوم إيه واحدة ننوسة عين أمها تدخل بدم بارد لتقول له "البوست دا عاجبنى وأنا هسرقه".. قال يعنى بكدا أخدت الملكية الفكرية.. وبدون انتظار لرد الراجل إذا كان هيسمح أو لا يسمح تلاقيها حادفة البوست على صفحتها وهاتك يا تعليقات ويا لايكات من شوية المهووسين بصورة البروفايل بتاعها اللى هي مش صورتها أصلا! قوم إيه الراجل الأولانى صاحب البوست الأصلى تصعب عليه نفسه ويصاب بالاكتئاب نتيجة الحسرة على حاله.. آه والنبى زمبقلكم كدا.. وقد يؤدى هذا إلى أنه يقوم بتطليق الست حرمه بدون إبداء أسباب! لأ وواحد تانى ينشر بوست ويكتب تحته "منقول".. قال يعنى بكدا برأ ذمته من السرقة.. مع أنه لم يقل لنا منقول من مين.. المشكلة إن البعيد مش بيتكسف وهو بيشكر الناس على إعجابهم بالبوست اللى هو سارقه في الأساس.. آآآأأخ ياما نفسى أدب صباعى جوا عينك يادى الجدع.. ياما نفسى أجيب فنجات شاى سخن بيغلى وأدلقه فوق نافوخك الأجوف يا راجل يا أجوف يا مجفف.. يلا بقى أنا مش هطول اكتر من كدا علشان شلاضيم بُقى وجعتنى.. السلامو عليكوووووووووووو
