يا وكستاه ويا حسرتاه على الفريق الذي تاه.. أنا ياخويا معرفش الأهلي جراله إيه.. فجأة كدا اختفى من الملعب وكأن الترجى التونسى كان بيلاعب نفسه.. يا داهية دقى ووسعيلى بُقى.. دا أنا أول مرة في حياتى أشوف مباراة من طرف واحد. طب يكونش ملعب "رادس" بلع اللاعيبة؟!.. طب يكونش اتخطفنا يا بيبو؟!.. أم أننا لبسنا الفانلة الزرقاء والترجى كان واخد الحبة الزرقاء.. فاختفينا على استحياء؟! أنا ياخويا أهلاوى ابن أهلاوى ابن ابن أهلاوى لكننى لأول مرة أشعر بالتوهان.. وأقول ياريت اللى جرا ما كان.. آه يا دهوتى يانى يابا.. واااااخيبتاااااااه على الشياطين الحُمر يا ولداه.. بقا كدا يا محمود يا خطيب يا أحرف لاعيب.. ماهو لو ماكنتش الخطيب كنت قلت عليك مش فاهم أو ندهتك النداهة.. لكن أنت الخطيب يا بيبو وفاهم يا خويا كل حاجة في الملاعب. يا خسارة فلوسك يا سُمعة اللى راحت على القهاوى والكافيهات.. طب أنا أبيع شلاضيم بُقى وتقولولى هو إيه سر تمسك الأهلي بمروان محسن.. دا مالمسش كورة توحد ربنا يا جدع. بس أكيد مروان ده له واسطة جامدة.. بيلعب كل الماتشات مع أنه لا بيسجل أهداف ولا حتى بيصنعها سواء في الأهلي أو في المنتخب. آه يا شلاضيمى يانى يابا.. طب هو إيه "كريم نيدفيد" اللى أنت منزلهولى وإحنا مهزومين ده.. دا كان علاج للبواسير التي أصابت لاعيبتنا أم ماذا يا هذا.. هي فين صفقات الأهلي وفين ناشئى الأهلي يا من أكلتم دماغ أهلي. كله كوم وحمودى بودى بودى كوم تانى.. دا بقا كان بيتفرج على الماتش زينا بالضبط.. دا الواد أزارو له حق يشق هدومه.. دا إحنا 40 مليون أهلاوى شقينا هدومنا منكم خلال ال90 دقيقة.. دا السيستم بتاع الفرقة كان واقع ورايح في ستين ألف نيلة. مجلس إدارة الأهلي جايبلى مدرب فرنساوى.. مع أننا مالناش في الفرنساوى خالص ياخويا ولا بنفهم فيه! لقد شمت فينا الزمالكاوية على آخر الزمان وياريت اللى جرا ما كان.. والسلامو عليكوووووووووووووو
