اتصلت صباح اليوم بالرئيس محمد مرسى أعزم نفسى على فنجان قهوة بقصر الرئاسة ولم يتردد الرئيس حيث قال لى: دى هتكون أحلى اصطباحة يا عم سحلول.. بالفعل ذهبت إلى القصر فى نحو الساعة السابعة صباحا وتناولت فنجان القهوة مع السيد الرئيس الذى قال لى: مش عوايدك يعنى يا عم سحلول تصحى بدرى كده!!.. قلت: طب أعمل إيه يا ريس.. العيال واكلين دماغى كل يوم وعايزينى أقابلك!!.. قال: خير يا عمنا مالهم عيالك؟!.. قلت:لا يا ريسنا مش عيالى.. انت فاهم غلط.. أنا بتكلم على الضباط الملتحين المعتصمين أمام وزارة الداخلية.. هما برضو زى عيالى يا ريس وعيالك انت كمان!!.. قال: طبعا عيالنا بس أنا مش عارف أعمل إيه معاهم والله يا عمنا!!.. قلت: يعنى إيه مش عارف.. أمال مين اللى يعرف؟!.. قال: مش عارف برضو يا عم سحلول!!.. قلت: طب ليه وزير الداخلية لم يصدر قرارا بعودتهم للعمل أو حتى يقوم بفصلهم؟.. أى حاجة تثبت إن الموضوع فى دماغكم.. العيال هيخللوا فى الشارع بقالهم شهرين معتصمين!!.. قال: بصراحة يا عم سحلول الكام ضابط دول حطونا فى ورطة.. يعنى لو رجعناهم الشغل بأم اللحية بتاعتهم دى الإعلام والإنقاذ والفيس بوك مش هيرحمونا وهاتك يا تريقة.. ولو فصلناهم خد عندك حازم أبوإسماعيل ومشايخ السلفية ويطلعلنا بكار يتفزلك علينا وهاتك يا شجب واستنكار.. أنا مش عارف أعمل إيه لأن وزير الداخلية برضو مش عارف وبيقوللى اللى تشوفه يا ريس هعمله.. وبالفعل يا عمنا منظر اللحية الطويلة دى مش ماشى مع البدلة الميرى خالص.. طب انت عارف يا عم سحلول لو كانت لحيتهم دى لحية إخوانية كانت عدت على الناس كلها لأن إحنا لحيتنا شيك ولطيفة وماشية مع الموضة.. أنا قلت لوزير الداخلية يلمحلهم بكده من تحت لتحت لكنهم رفضوا وقالوا إحنا مش إخوان وهى دى لحيتنا.. طب دبرنى انت يا عم سحلول!!.. قلت: عموما أنا هروح أعرض عليهم موضوع اللحية الإخوانى ده وهقنعهم بإنهم بعدما يعودون إلى العمل ممكن يطولوها شوية.. بالفعل استأذنت من الرئيس واتجهت إلى الضباط المعتصمين وقلت لهم على الاقتراح فهبوا فى وجهى كما يهب فى وجهك وابور الجاز وأخذوا يهتفون فى نفس واحد " لا يأس ولا استسلام .. ضباط اللحية مش هتنام ". وهنا تركتهم وهرولت ناحية سيارتى قبل أن يأكلونى كوجبة إفطار!!