تصدق مين.. تكدب مين.. خمسين قناة كل واحدة بكلمة.. مش فاهمين.. إيه الحكاية بقى إعلامنا رايح فين.. الرمل بيقول فى حاجة تحير الملايين.. تفتح تلاقى برامج تمدح السلاطين.. وفيه برامج ما تنشفشى لناس قاصدين.. والدنيا هيصة وتقعد تسمع الحلوين.. والناس ماهش عارفة تفتح مين.. وتقفل مين.. حرية الرأى مش قنوات شمال ويمين.. وكل واحدة فى سكة والعباد تايهين.. والكلمة مطلوبة لكن صدق مش تفانين.. فيه مية قناة للحكومة!! وقناة لناس تانين!!؟.. وكل واحدة فى طريق.. وكلنا فاتحين.. على ناس بترفص.. وناس تانية يقولوا آمين.. عايزين يكون فيه معارضة مفتحة وصاحيين.. ورأى تانى مؤيد بس يبقى متين.. لكن بلاش يبقى فيه قنوات لناس تابعين.. ويروجوا لكفر يقصد لمة الجاهلين.. وبيسمعوا أى حاجة يقولوا آه موافقين.. كان الكلام فى السياسة أو فى دنيا ودين.. مش فيه وزير تسألوه على فين كدا رايحين.. وكل شيء فيه التزام بيريح السامعين.. واللا الحكاية بقت سايبة وخلاص يامعين.. حافضل أقول محتاجين إعلام جرىء وأمين.. والرمل زى الودع.. عارفينها رايحة لفين.
