لا تخلو الحياة الزوجية من المشاجرات والمناوشات لكن بعضها يصل إلى حد الاشتباك بين الزوجين سواء بالألفاظ أو الأيدي، حيث روى رواد موقع التواصل الاجتماعى "فيس بوك" أطرف المشاجرات الزوجية التي شاهدوها من خلال صفحة "الكومنت الفصيل". - خناقة بسبب اللحمة قالت بوسي ضاحكة: "في واحدة جارتي كانت بتتخانق مع جوزها بيقولها أنا عاوز آكل لحمة قامت مزعقالو وقالتلوا تصدق انا كنت بحترمك لكن انت طلعت راجل مهزق لحمة إيه دي اللى انت عاوز تكولها وبهدلته والله". - الشقة من حق الزوجة وأضافت نوسا: "أخويا ومراته أما يتخانقوا ويقولها امشي لأمك بتقولو خلاص الشقة بقت من حق الزوجة يعني انت للى تلم هدومك وتمشي وتبعتلي مصاريفي ومصاريف عيالي.. شخصيتها قوية وأنا وماما بنشجعها". - بعد الموت مفيش راحة وروت دعاء:"أنا مرة كنت بتخانق مع جوزي وقالي يارب اموت عشان ارتاح.. قولتله ومين قالك انك هترتاح مش ممكن تدخل النار"، وقالت آية: "قالها انتي اتجوزتيني عشان فلوسي قالت له يا واخد القرد على ماله راح المال وبقى القرد على حاله". - شيل وحسابى معاك بعدين وقالت أمنية: "أنا مرة كنت ماشية مع إخواتي وواحدة وجوزها ماشين فهو شايل بيبي وماسك ولد في إيده والأخير ماشي لوحده فا بينده على مراته بيقولها تعالي قالتله آجي فين يامهزق وكانت ماسكة شنط راحت رامياها في الأرض، وقالتله شيل وحسابي معاك في البيت لما أروحلك". وأضافت: "أنا وقفت تنحت وراحت شاخطة فيا وزعقتلي أنا خفت جدا واخدت الشارع كله جري لحد البيت وسبت إخواتي دي بتهزق جوزها في الشارع يبقى هتعمل فيا أنا إيه". - ضربتك بكل حاجة وروت منة: "مرة واحد جارنا كان بيتخانق مع مراته عشان ولاعة فبتقوله كل ده عشان ولاعة بجنيه رد عليها بزعيق جامد أوي وقالها لا باتنين جنيه". وقالت هبة: "واحد جارنا كل ما يتخانق مع مراته يقولها مفيش حاجة مخبطكيش بيها مش فاضل غير مخرطة الملوخية". وأضاف محمود: "كان فيه واحد أصلع بيتخانق مع مراته راحت قالتله أنا مبحسدش حد في الدنيا دي كلها غير شعر رأسك عشان سابك وارتاح منك.. الستات جبابرة في الرد". - خدت من الحمار كل حاجة وقال أدم: "أنا سمعت واحدة وجوزها ماشيين في شارع قالتله سبحان الله خدت كل حاجة من الحمار ماعدا ديله وودنه".
