ارمى بياضك هنا يارئيس وزراءنا.. وحتعمل إيه قول لنا فى الحكم شوقنا.. قول للوزارة تخفف حبة من داءنا.. عايزين نشوف مين بقى م الغم يرفعنا.. عايزين وزارة تحس بالناس وتسمعنا.. ياخوفى نسمع كلام خالى من المعني.. خليك صريح والنبى مش ناقصة أوجاعنا.. وحندعى لك كلنا لو يوم ترجعنا.. لحضن مصر الحبيبة اللى ترضعنا.. من صدرها خير كتير وتشيل مواجعنا.. وقول لى راح تعمل إيه فى كل أوضاعنا.. الناس خلاص فرقعت والغلب شبعنا.. قول للوزارة بلاش توعد وتخدعنا.. ونفسنا والنبى للعز ترفعنا.. وحأقول لك إيه واللا إيه خليك مطاوعنا.. وقول كمان للرئيس الشعب مرجعنا.. والكل قاعد يشوف آخر مطامعنا.. أصل السكوت من زمان ياصاحبى ضيعنا.. وحأقول لك إيه مش حأقول ياصاحبى طاوعنا.. وقول لنا سكتك على فين تجمعنا.. وآدى إحنا ساكتين وبكرة نشوف وزراءنا.. يارب هات الفرج واسترنا وارفعنا.. وبكرة حأرجع أشوف بختك وأرزاقنا.. وآخرتها إيه ربنا يستر ويسمعنا.