شاطر: ازى الصحة مشطور: تعبانة.. تعبانة شاطر: هتعملى فيها محمد هنيدى فى فيلم صاحب صاحبه.. ياسيدى أنا باكلمك عن الصحة اللى ليها وزارة مشطور: عيانة.. عيانة.. ومحتاجة اللى يعالجها شاطر: طيب بلاش الصحة إزى التعليم؟ مشطور: أبصم بالعشرة إن نظام تعليمنا هو الوحيد فى العالم اللى بيخرج لنا جهلة من حملة الشهادات شاطر: يعنى العيب فى المدرس ولا فى المنهج ولا فى التلميذ؟ مشطور: لا.. العيب فى التخته والطباشيرة شاطر: طب ازى الزراعة؟ مشطور: شريفة فاضل الست المغنية المشهورة كان لها أغنية زمان بتقول «فلاح كان فايت بيغنى من جنب السور.. شافنى وأنا باجمع كام وردة فى طبق بنور» دلوقت لا فيه فلاح ولا وردة لكن السور موجود! شاطر: بس فهمت أنت عايزنى أسألك إزى الشرطة؟ مشطور: لا السؤال الأهم إزى البلطجة؟ شاطر: يعنى عايز تمسك المظلوم وتسيب الظالم مشطور: حلو قوى يبقى لازم أسألك إزى القانون؟ شاطر: ياسلام عليه فى الموسيقى الشرقية وكان دايما منور فى فرقة أم كلثوم والموسيقى العربية. مشطور: ياسيدى بلاش لوع أنا باكلمك عن القانون اللى هو بيقول للدستور يابابا! شاطر: عرفته ما هو اللى بيقول للفوضى ياماما! مشطور: اوعى تقوللى ماما أمريكا!! شاطر: لا هاقولك إزى الحرية؟ مشطور: بس خلى بالك عشان الحرية لوحدها مش كفاية لأنها بتنزل طقم مع أختها «الديمقراطية»! شاطر: وعلى كده بقى الاختين الحلوين وصلونا لفين؟ مشطور: ميدان التحرير ياراجل شاطر: بالمناسبة بقى إزى طرة؟ مشطور: إن شاء الله هنعمل نفق.. يوصل بين سجن طرة والمركز الطبى العالمى ويبقى حلينا الاشكال شاطر: يبقى ضرورى أسألك إزى الاونطة؟ مشطور: هتلاقيها فى أحزاب ومجالس ومتوفرة فى جميع المحلات فى عبوات مختلفة ومنها بودرة وسائلة وغازية شاطر: مابلاش الغازية.. الأنابيب تزعل مشطور: مع أنها المفروض تفرح لأن الوزير جودة عبدالخالق هيجوزها للكوبون وهتسكن عند بقال التموين مع أهل جوزها السكر والزيت والعدس.. وبالرفاء والبطيخ شاطر: يعنى اقدر أسألك إزى العدالة الاجتماعية؟ مشطور: ابن حلال.. ماتعرفش عنوانها إيه.. أنا عايز اشوفها ضروري! شاطر: لا معايا رقم تليفونها 52 واحد 1102 مشطور: ولو طلبتها ياترى هترد؟ شاطر: فى حالة واحدة فقط! مشطور: إيه هي؟ شاطر: لما تقول لها إزى الثورة؟!