شاطر: قررت إيه بالنسبة للرئيس الجديد؟ مشطور: الحقيقة لسه باحسبها.. حمدين «مقنع» وأبو الفتوح «معقول» وعمرو موسي «مقبول» وحازم أبو اسماعيل «فاهم» ومنصور حسن «حكيم» ومرتضي منصور «مشطشط». شاطر: وتوفيق عكاشة؟ مشطور: ده عايز له جمهورية من بابها تسليم مفتاح.. يلعب فيها علي كيف كيفه!!. شاطر: لكن بيقولك أن الرئيس المنتظر رغم كل المرشحين الموجودين لسه لم يظهر بعد؟! مشطور: بيستوي علي نار هادية! شاطر: هو حلة محشي! مشطور: أنت بتقول فيها ما هو ضروري الرئيس يكون «مهضوم» عشان الشعب يقدر يبلعه! شاطر: أنت كده بتتكلم عن «قرص اسبرين». مشطور: ياريت عشان ينقذنا من الصداع اللي إحنا فيه. شاطر: بس ياخوفي بدل ما نبلعه هو اللي بيلعنا زي «الحوت» بتاع كفر مصيلحة. مشطور: أنا خايف من حاجة تانية خالص! شاطر: حاجة إيه؟ مشطور: نلاقي عدد المرشحين للرئاسة أكثر من الناخبين!! شاطر: وتفتكر من السهل علي أي واحد يجمع 03 ألف توقيع من مصر كلها. مشطور: ياسيدي الفلوس قبل كده خلت الأموات يطلعوا بنتخبوا ويرجعوا تاني!! شاطر: طيب.. بعيد عن الفلوس.. كل المرشحين بيتكلموا كويس لكن عن الفعل ما تلاقيش. مشطور: ما هم لازم يتكلموا وصاحب العقل يميز واللي فيه عقل وراس.. لا يمكن يبقي قرطاس. شاطر: علي رأيك لكن كلام عن كلام يفرق.. وبالنسبة للمصريين كلهم.. يعرفوا سيدنا يوسف اللي قدم نفسه لفرعون وقال له: «اجعلني علي خرائن الأرض إني حفيظ عليم». مشطور: بس قبل كده.. الملك قال: «ائتوني به أستخلصه لنفسي» فلما كلمه قال: «أنك اليوم لدينا مكين آمين». شاطر: لكن نرجع ونقول فين هو سيدنا يوسف؟ مشطور: هتلاقيه لما تدور علي ضميرك وتفتكر أنت راكنه فين؟!