شاطر: هو ممكن حسني مبارك يرجع تاني! مشطور: يرجع فين؟ شاطر: يمسك البلد مشطور: وهي البلد ولا مؤاخذة سايبة ودايرة علي حل شعرها! شاطر: ياسيدى أنا قصدي يحكمنا مشطور: ومين قالك إنه سابنا عشان يرجع لنا؟ شاطر: يعني بيحكمنا من سجنه قصدي من سريره؟ مشطور: أنت شايف إيه؟ شاطر: اللي اتغير في البلد.. ان أمين الشرطة فيما مضي كان يجيب أتخن شنب من قفاه في الكمين.. دلوقت بيحصل العكس.. والبلطجي هو اللي بيقلب الضابط! مشطور: يعني مفيش ثورة؟ شاطر: طبعا فيه.. لكن الكل معاها والكل ضدها! مشطور: فكرتني بحسني مبارك لما كان يطلع أيام الحرب علي غزة وإسرائيل نازلة فيها طحن ويقف يقول: إحنا لا مع دول ولا مع دوكهما!! شاطر: طيب خليني أنا مجنون وحضرتك عاقل وفهمني.. إيه اللي اتغير في دولة العواجيز؟ مشطور: لا عندك.. حسام حسن جاب لنا كاس أفريقيا وهو داخل علي الأربعين.. وابوتريكة الله يبارك له في صباع رجله اليمين عنده كام سنة وهو حبة البركة في الملعب. شاطر: لكن معاهم فيه شباب فيه حيوية فيه تجديد.. وبعدين الثورة اللي عملها شباب.. تقدر تقوللي هما فين دلوقت؟ مشطور: علي القنوات الفضائية منورين ياحبايبي وقناة ON TV يقعد لها في صحتها وعافيتها خلتهم بتوع إعلام وبيقدموا برامج زي الفل.. وحتي بيعرفوا يقولوا: فاصل ونواصل وفيه منهم علي التحرير والنهار. شاطر: المفروض بقي يامشطور أفندي.. الثورة لما توصل للكبار يرجعوا شباب في تفكيرهم..والشباب يكبروا في تصرفاتهم.. ومع ذلك خلينا في السؤال الإساسي.. هو حسني مبارك ممكن يرجع تاني؟ مشطور: هو كان مشى عشان يرجع! شاطر: وثورة يناير.. والشهداء والمصابين اللي وقعوا وراحوا علشان عايزين تغيير؟! مشطور: فكرتني بالست جارتنا اللي طلبت الطلاق من جوزها سيد حرنكش عشان لازم يغير اسمه ولأنه بيحبها وباقي علي العشرة.. فعلا غير اسمه وبقي «علي حرنكش»!!
