عرافة أقرا الودع والرمل.. أبين زين.. وأقول على المستخبى واللى جو العين.. إرمى بياضك هنا يا مجلس الشورى.. وقول لى جاى تعمل أيه.. هى البلد عورة... مالكش أى اختصاص... دى سياسة مش كورة... ولا مرة قدمت رأى وكنت أسطورة.. أنا شفت مستقبلك بنورته مكسورة.. وسكتك كلها زحاليق وشبورة.. فياريت تريح بقى وتقول لنا باى باى.. مجلس بدون اختصاص تقبل تكون إزاى... هى الحكاية حصانة وزق فى الترماي.. عايزينكو مجلس صحيح... وتكونوا فى الصورة... ومادام حتيجى بقى... إطلب يكون لك حق... ويبقى صوتك عفى ... فى قول نعم أو لأ.. ما تكنش زى اللى فات... سيد قرار نفسه... والرأى ملزم لنا واللى يطق يطق.. إسمع كلام الودع... وقول لى رايح فين... وأنا بكرة راجع أشوف بختك وأبين زين..