خامس وزير للداخلية.. راح تعمل إيه؟ سبقك كتير م الألْويَّة.. وسابوها يابيه.. مش عارف ليه.. وكل واحد بيجي يمشي ويقول بُرْيه.. ياهل تري انت حتقعد فيها لوقتيه.. الأمن فيه سر مخبي.. ما تقول لي عليه.. وانت طريقك مليان شوك.. تقدر تمشِّيه؟ وحتعمل إيه؟ في الداخلية..أكتر من اللي سبقوك فيه.. مرور وعايز يتوزع.. في كل حتة الناس تلاقيه.. وبلطجية وشبيحة.. قرفها فوق راسنا بترميه.. حتي القانون وسط الزحمة.. مش لاقي حد يا ناس يحميه.. وكل يوم بنلاقي وزير.. حيفيد بأيه كتر التغيير.. الأمن مش هيصة وزيطة.. الأمن مستقبل ومصير.. وآدي انت جيت للداخلية.. مطلوب بقي حل الفوازير.. وللا حتقعد شهر اتنين.. وتسيبنا واقفين في الطوابير.. إيه الحكاية احترنا خلاص.. والأمر محتاج للتفسير.. ولحد امتي حنستني خايفين كده من لص خطير.. ونفسنا تصحيح ونشوف.. منك بقي ضبط وتطهير.. وللا حنرجع زي زمان.. تعظيم سلام ونسيبها تطير.. عايزين بقي شرطة بتعرف.. المخفي والمتداري في بير.. حتقول لي إيه وحقول لك إيه.. الشعب مستني التغيير.. وآدي انت جيت.. مرحب مرحب.. وتعليماتك للمآمير.. عايزين فيه أمن يأمَّنا.. مش محتاجين تصاريح يا كبير.