ليهم حق طبعاً أن يخرج كل فئات الشعب بكل انواع المظاهرات.. واللى يلاقى دلع وما يدلعش يبقى ابن اللى باللى بالك..!! أنا شخصياً مش عارف هما عاملين زيطة وزمبليطة ليه..؟! الحمد لله عايشين زى الفل والياسمين والآشية معدن صفيح مصدى والحياة ماشية زى السكينة فى الجاتوه، لا بنعانى أزمة عيش ولا بنزين ولا سولار ولا مرور ولا بنعانى من الأمراض ومستشفيتنا ذى القشطة.. والأدوية متوفرة وبسعر التراب ومش لاقية حد يشتريها.. حتى التعليم تشعر وكأن مدارسنا الحكومية مدارس أوروبية كل تلميذ جالس على مقعد لوحده وعلى يمينه عصائر وعلى شماله فطائر وماتنساش تديله حقنة فى الحساس وماتقولش كفاية خلاص ؟؟ .. وأسمع ياجدع إنت وهو.. الفرح فرحنا واللى يحبنا مايضربش نار إيه يعنى لما شوية يخرجوا فى مظاهرة يقطعوا الطرق ويعطلوا مصالح الناس..؟! إيه يعنى لما المدرسين يعتصموا أول يوم فى الدراسة علشان يشردوا أولادنا..؟! ايه يعنى لما بتوع اتوبيسات النقل العام السواقين والكمسارية يضربوا عن العمل قبل عيد الفطر وفى شهر رمضان علشان يعذبوا الفقراء والغلابة اللى بيستخدموا وسيلة رخيصة للمواصلات.!! ولما تدخل وسط المظاهرة وتسأل أى واحد فيهم هو فيه ايه..؟! تشعر وكأنك فى مولد وصاحبه غايب..!! العجيب ان معظم متظاهرى مجلس الوزراء وقصر العينى عاملين كشف زى جدول متفقين عليه.. كل مظاهرة فئوية لها توقيت محدد ومكان تقف عنده ولما تنتهى من الصياح والعويل تمشى وتدخل المظاهرة الأخرى بنفس الدخلة وهكذا والكل بيهتف على الفاضى والمليان وماتعرفش هما عاوزين ايه..؟! اللى شايل يافطة على قلبه واللى عمال يتخفى وسط المتظاهرين وكأنه هارب من »حكم نفقه« وكله كوم وهتاف الستات كوم اللى تضرب زغرودة واللى ماسكة واللى ماسك بؤجة ودايرة وسط المتظاهرين عملة زى المطلقة.. وشوبش ياحبايب شوبش..!! ولما تتكلم مع واحد فيهم.. يمتعض وجهه ويفشخ بقه ويديك من المنقى يا خيار ويقولك: الوزير فلان الفلانى.. ضلالى وفلاتى وعينه زايغة.. اللى عامل فيها شيخ مشايخ..!! طب ياعم الحاج أنتم عاوزين إيه بالترتيب علشان نفهم والشعب يفهم.. أجارك الله.. هجوم وأصوات عالية وصراخ وتخرج من المولد بلا حمص لا أنت فاهم ولا هما فاهمين..!! بصراحة كده.. عملية المظاهرات غير منظمة وهرجلة ومحتاجة ترتيب ودراسة حتى يمكن للمتظاهرين طرح أفكارهم وتوصيلها إلى المسئولين كفاية حكومة ظلمونى الناس ظلمونى وطفوا قنديلى حط إديها على خدها ومستنية الفرج من عند أم فرج..!! ياجماعة الخير حرام عليكم.. كوز الثورة إنخرم وطرطش على كمى.. قلل خصامك وارحم عذاب أمى..!! مش كفاية حكومة ظلمونى جات تفرح فرشلها المتظاهرين المطرح ياإخونا احنا زهقنا وكفاية بقى هيصة وتخبيط فى بعض ياعالم أهمدوا شوية وكنوا فى بيوتكم وسيبوا الناس تشتغل شوية علشان نعرف نحسابها بعيداً عن حجة المظاهرات وتعطيل الأعمال.. ياسلام عليك ياشعب مصر لما تتلهى بشوية حرية يبقى كل شىء مباح حتى الضرب على القفا بيبقى زى التفاح..!! فتكم بعافية