قامت مبادرة "شفت تحرش"، اليوم، بنشر شهادة فتاة تعرضت للتحرش الجنسى، والتزمت المبادرة بعدم نشر بيانات الفتاة حفاظًا على حقها في سرية بياناتها وهويتها. نص الشهادة: موضوع التحرش ده خلاص جابلي اكتئاب وجه على وقت أخاف أصلا أنزل الشارع وفكرت أسيب شغلي... مع أن شغلي في نفس المنطقة اللي أنا ساكنة فيها ( المعادي ) يعني ولا منطقة عشوائية ولا... أنا من زمااان من وأنا طفلة كان بيحصلي تحرش سواء بالكلام أو بالطرق المقرفة أن حد يمشي ورايا أو أنه يفضل متتبعك بالليزر الأخضر والأحمر ده على كل مناطق جسمك أو أسوء حاجة بقى إنه يلمسك ! آخر حادثة كانت أول أمبارح في شارع النصر في المعادي.. رايحة شغلي الصبح الساعة 10 وواحد متحرش... ماشي ورايا بالموتوسيكل كان في التلاتينات تقريبا وبدقن وعمال يلف حاوليا بيقول كلام زي الزفت وسافل جداااااا.. الناس شايفة القرف ده وساكتة وطبعا.. أنا كان ف أيدي ازازة بيبسي الكبيرة دي في شنطة روحت مسكت الأزازة وبعزم ما فيا ضربته على ضهره بيها وفضحته وشتمته والشارع طبعا كله أتلم وهو جري طبعًا زي الفار.. المهم.. تعليقات الناس: واحدة ست بتقولي: يا بنتي لما تلاقي حاجة زي كدة أسكتي عشان ماتفضحيش نفسك !!! راجل بقى بيقولي: طول ما أنتي في الشارع وسط ناس عمره ما هيمد إيده عليكي ويلمسك هو هيقولك كلام بس !!!! و ناس تانية كشت مني وشايفني أنا اللي سافلة عشان شتمت بصوت عال.. بس أنا بعد كدة مش هسكت حتى لو همووت فيها بس مش هسكت على حقي أبدا..
