شهد عام 1979، بداية رحلة الفنانة سلوى خطاب في عالم السينما من خلال المشاركة في فيلم «عشاق تحت سن العشرين»، ولكنها اشتهرت أكثر من خلال دورها في مسلسل «هند والدكتور نعمان» الذي انتج عام 1984، ومن ذلك الحين تنوعت أعمالها السينمائية والدرامية وكذلك أدوارها بين الجادة والكوميدية، واستضافها الفنان بيومي فؤاد، خلال برنامج «بيومي أفندي» على قناة «دي أم سي»، وكشفت خلاله بعض أسرار حياتها الشخصية والعملية. كرهت الكاريزما بتاعتك أشادت سلوى، بالحضور الذي تفرضه شخصية الفنان بيومي فؤاد، على القائمين علي أي عمل يشارك فيه، موضحة: «عندك كاريزما تطغى على كل زمايلك اللي شغالين معاك، وديه حاجة من عند ربنا، بس أنا كرهت الكاريزما ديه». دهاء الزوجة مهم أوضحت سلوى خطاب، حقيقة ما تقصده من قولها: «الجواز محتاج لمكر الزوجة»، موضحة: «أنا بفضل إن المرأة على قدر من الدهاء الحسن، فهو مطلوب في بعض الأوقات»، ساخرة من حديث بعض الفنانين عن خضوعهم لفترة معايشة تصل لسنوات لمعرفة طبيعة الشخصيات التي سيتقمصونها في أعمالهم، قائلة: «أنا لو عملت زيهم في الأدوار اللي بقدمها مش هاروح بيتنا». بخاف من الأعمال الكوميدية أكدت سلوى خطاب، أنها عندما اكتشفت حبها لمجال التمثيل، قررت الالتحاق بمعهد الفنون المسرحية، لتثقل موهبتها بالخبرة العلمية، مضيفة: «أنا شايفة إن ديه أحسن خطوة عملتها، لأننى تعلمت كيفية الحكم على الأعمال الدرامية والسينمائية قبل خوض تجربتها»، مضيفة أنها كانت تشعر بالخوف من تقديم الأدوار الكوميدية، مبررة: «ما كنتش عاوزة أعمل كوميدي يظهر على أنه تهريج». كلاب أصحابي مش بيحبوني أوضحت سلوى خطاب، أنها ترفض المشاركة في تصوير أكثر من عمل في وقت واحد، معللة ذلك بأنه يسبب لها قدرًا كبيرًا من الإرهاق، بجانب أنه يسبب لها تضارب في الشخصيات التي تؤديها، مضيفة: «أنا عملت ده مرة واحدة قبل كده، بس ماكررتهاش تاني». وانتقدت سلوى، قيام البعض بتربية الكلاب في منازلهم، مستطردة: «أنا مش فاهمة يعني إيه أجيب كلب معايا في البيت وكل ما يهزلي ديله أقوله: (يا حبيبي أنت فرحان)، أنا عايزة حد أكلمه ويكلمني، أنا ممكن أربي بني آدم، لكن كلب الموضوع هيبقى صعب عليا، وبعدين أنا بخاف من الكلاب، وكلاب أصحابي مش بيحبوني عشان كل ما أروح يتحبسوا، وأرفض أن حد يسكن معايا في بيتي ومعاه كلب». عمليات التجميل هوس في دماغ الستات قالت سلوى خطاب، إنها لا ترى مشكلة في خضوع الفنانات لعمليات التجميل إذا كانت هناك ضرورة لها، متابعة: «أنا مش ضد عمليات التجميل، بس هي عاملة هوس في دماغ الستات، أنا ما عنديش مشكلة أعمل عملية تجميل لحاجة مهمة عندي، صحيح إن الحمد لله ربنا ساترني وما عملتش عمليات تجميل لحد دلوقتي، بس لو أراد إن أعمل بعد كده، مش هيبقى فيه مشكلة خاصة لما أكبر في السن». أفضل وصفة صحية للتخسيس ذكرت سلوى، أنها تحافظ على رشاقة جسمها من خلال اتباع نظام غذائي وضعته لنفسها، شارحة: «أنا مش حارمة نفسي من حاجة، وباكل كل اللي أنا عايزاه، بس باكل باعتدال، الاعتدال بالنسبة ليا نظام حياة، بجانب الاهتمام بأكل السلطات بأنواعها المختلفة"، مقدمة بذلك وصفة سحرية للتخسيس. وتابعت: «أنا مش بحب أكل الشارع، وبخرج من كل مسلسل أو أي عمل بشارك فيه بطني بايظة، بسبب النوع ده من الأكل، وعشان كده بحب أطبخ في البيت». مش بجامل في شغلي نفت سلوى خطاب، مشاركتها في أي عمل سينمائي أو درامي على سبيل المجاملة، مستكملة: «مش بجامل في شغلي خالص، بس فيه أعمال شاركت فيها وندمت على ظهوري فيها، عشان الأعمال ديه ما طلعتش بالجودة اللي كنت متخيلاها، وديه حاجة مش بإرادتي». وتابعت: «أنا مش من هواة الفيسبوك، أنا أخري أتصفح السوشيال ميديا زي أي مجلة، عشان أتابع الأخبار مثلًا". يذكر أن الفنانة سلوى خطاب، تشارك في مسلسل «سك على إخواتك» للفنان علي ربيع، الذي سيخوض به الموسم الرمضاني المقبل، ويشاركها البطولة مجموعة من النجوم منهم صبري فواز، صلاح عبدالله، هنا الزاهد، سهر الصايغ، كريم عفيفي، ميرنا نور الدين، إخراج وائل إحسان، وتأليف كريم فهمي وإياد شهاب. وتخوض سلوى، سباق شهر رمضان المقبل من خلال المشاركة في مسلسل «نسر الصعيد»، أمام النجم محمد رمضان، من تأليف محمد عبد المعطى، وإخراج ياسر سامي.
